AMBENO (TOP) – Juventude no komunidade sira iha Rejiaun Administrativa Espesial Oe-Kusi Ambeno (RAEOA) inklui família afetadu sira ne’ebé to’o oras ne’e seidauk hetan kompensasaun hahu prepara ona kondisaun hodi halo "revolta" hasoru Arsenio Paixão Bano.
Juventude no komunidade sira deklara assuntu ne’e hafoin Primeiru-Ministru, Taur Matan Ruak foti desijaun ezonera tiha José Luis Guterres ‘Lugu’ hodi nomeia fali Arsenio Paixão Bano ba kargu Prezidente Autoridade ba RAEOA ne’ebé durante tinan lima nia laran halo joven barak atu asesu ba serbisu administrasaun públiku mós tenke uja kartaun partidu nian.
Joven sira ne’e mós konsidera prezensa Lugu nian iha Oe-Kusi Ambeno maske foin mak halo fulan 7, maibé sira sente kedas ona ukun a’an loloos kompara ho Prezidente Autoridade tuan, Mari Alkatiri ho Arsenio Bano halo sira sente moris iha ditadura nia laran.
“Ami juventude no komunidade tomak iha RAEOA sente orgullu, kontente tebes no foin mak sente ukun rasik aan loloos bainhira Prezidente Autoridade José Luis Guterres to’o mai iha Oe-Kusi Ambeno,” Domingos Kolo nu’udar porta-voz juventude no komunidade sira deklara assuntu ne’e liu husi konferénsia ba imprensa iha Palaban, Oe-Kusi Ambeno, Kuarta 10 Juñu 2020.
Kolo konsidera nomeasaun PM Taur ba Lugu iha fulan Novembru tinan kotuk, nu’udar nomeasaun ba salvador ida hodi salva povu Oe-Kusi Ambeno tomak ne’ebé moris iha ditadura nia laran durante tinan 5.
“Desijaun nomeia Lugu ne’e hanesan desijaun salvador hodi mai salva no hasai ami husi invazaun foun durante prátika hanehan ami, viola ami, explora no diskrimina ami durante tinan 5 iha RAEOA hahu husi 2014-2019,” Kolo afirma.
“Povu RAEOA durante ne’e moris iha otoritaríu Arsenio Paixã Bano ho nia ekipa pratika hanehan ami durante ne’e hanesan invazaun foun liu fali iha era invazaun Indonézia nian”.
Kolo ka’er metin ba Lugu nia filosofia katak nia ba Oe-Kusi Ambeno atu servi, la’os atu ukun.
“Husi nia filosofia ida ne’e ami nota ho kontente katak nia mai, la viola direitu umanu iha Oe-Kusi Ambeno, la hanehan povu, la diskrimina povu, la fahe povu ba koor partidu no seluk tan”.
Maske PM Taur desidi Arsenio Bano troka ona Lugu, maibé joven no komunidade sira ne’e rejeita prezensa Bano hodi ukun tan iha Oe-Kusi Ambeno.
“Ohin loron ida ne’e ami juventude no komunidade hakarak reafimra ami nia pozisaun katak ami rejeita totalmente no lakonkorda Arsenio Paixão Bano hodi ukun tan iha Oe-Kusi Ambeno”.
“Liu husi biban ida ne’e ami komunidade no juventude tomak deklara prontu no firme ona hodi hamrik kontra Arsenio Bano”.
Entretantu, durante kampaña politika AMP nian iha tinan 2018, porta-voz AMP atual Primeiru-Ministru, Taur Matan Ruak fó hela lia-fuan murak, lia-fuan midar, no rega hela bain been ba povu Oe-Kusi Ambeno iha kampu futebol Oe-Bau katak, bainhira AMP manan eleisaun sei hasai Alkatiri no Arsenio Bano, ikus mai lia-murak, lia-midar no bani been ne’e fila-fali ba PM Taur nia ibun tutun, ema nain-rua ne’e sira nia mandatu mak hotu, la’os hasai. Promesa politika ne’e halo povu Oe-Kusi Ambeno kontinua hela ho lia-moruk, lia-bosok, no bosok liutan, oras ne’e kontinua nomeia Arsenio Bano ba fali Prezidente Autoridade.
Maske iha loron 30 Abril 2018, eis portavoz AMP atual PM Taur ne’e sarani Arsenio Bano nu’udar "buan" ida, maibé oras ne’e nomeia hikas ona hodi troka Lugu.
“Ha’u iha mehi ida, imi hatene ha’u nia mehi mak saida. Tinan kotuk, ha’u hamrik iha ne’eba, ha’u ko’alia saida. Ha’u hakarak Mari Alkatiri sai husi Oe-Kusi. Tanba nia halo terus liu ona imi. Ha’u moe fali, Ha’u uluk Prezidente mai vizita suku hotu-hotu. Imi balun hakuak ha’u tanis dehan maun, Mari hare ami la di’ak. Maibé, imi fila kotuk ha’u mai hatete ba imi fó kadeira 8 de’it kasian,” hateten eis portavoz AMP atual Primeiru-Ministru Taur Matan Ruak durante kampaña ba eleisaun antisipada iha kampu futebol Oe-Bau, Oe-Kusi Ambeno iha loron 30 Abril tinan 2018.
“Agora ne’e referendum kedua, sa tan ho avo Nana, alin Naimori. Imi tenke fó. Maibé, la’os avo Mari de’it mak ha’u hakarak nia sai, buan ida Oe-Kusi oan ha’u koñese naran Arsenio Bano, ha’u hakarak nia sai tan,” afirma Taur.
Entretantu, faktu politika hatudu, maske Mari Alkatiri ho Arsenio Bano ukun durante tinan 5 ho osan barak, no konsege dezenvolve suku 5 iha Oe-Kusi Ambeno, maibé eleisaun 2017 no 2018, partidu FRETILIN kontinua lakon iha Oe-Kusi Ambeno.
