AMBENO (TOP) – Rezultadu monitorizasaun husi Ajensia ba Dezenvolvimentu Nasionál (ADN) iha Rejiaun Administrativu Espesial Oe-Kusi Ambeno (RAEOA) hatudu, projetu infraestrutura seguransa rua remata ona no hein de’it tempu atu entrega.
Tuir informasaun ne’ebé The Oe-Kusi Post (TOP) asesu husi Pájina Ofisial ADN-RAEOA nian katak, iha loron 26 Maiu 2026, ekipa ADN-RAEOA kontinua halo monitorizasaun ba implementasaun projetu infraestrutura seguransa iha área Oe-Silo no Passabe, ho objetivu atu asegura kualidade serbisu no progresu implementasaun tuir kontratu ne’ebé estabelese ona.
ADN-RAEOA rezista, projetu dahuluk ne’ebé monitoriza mak Konstrusaun Foun TL PDP UPF Building In Saben, lokaliza iha Saben, Oe-Silo – RAEOA. Projetu ida ne’e ninia na'in mak Ministériu Interior no implementa husi kompaña Toms Building Unipesoál Lda.
Projetu ne’e hahú iha tinan 2024 ho montante kontratu hamutuk $104,678.15 no durasaun serbisu fulan 6. To’o agora progresu fiziku atinji ona 100%. Projetu daruak mak Konstrusaun Edifísiu Foun Kazerna PNTL Eskuadra Passabe iha Passabe, RAEOA.
Projetu ne’e ninia na’in mak GPA RAEOA no implementa husi kompaña Silnoni Unipesoál Lda. Projetu ne’e hahu iha tinan 2025 ho montante kontratu $178,052.28 no durasaun implementasaun fulan 12. Progresu fiziku atual mós atinji ona 100%.
Iha monitorizasaun ne’e, ekipa ADN-RAEOA mós visita projetu New Construction of UPF Building in Oesilo ne’ebé lokaliza iha Oesilo.
Projetu ida ne’e ninia na'in mak Ministériu Interior no implementa husi kompaña Lifau Indah Unipesoál. Lda.
Projetu ne’e iha montante kontratu $474,947.44 ho durasaun implementasaun fulan 12. Ba daudaun ne’e progresu fiziku atual atinji ona 55%.
Husi atividade monitorizasaun ne’e, ADN-RAEOA espera katak, projetu sira bele kontinua implementa ho di’ak no remata tuir padraun tékniku ne’ebé determina ona.
