Kazu Atauro: Hetan ona Rui Martins ho kondisaun mate

DILI (TOP) — Mariano da Cruz nu’udar Atauro-oan ida hetan ona nia maluk Rui Martins ho kondisaun isin-mate ona iha área Cristo Rei no Hera nia kraik.

Mariano da Cruz ne’ebé mós nu’udar Atauro-oan ida katak, hafoin rona nia maluk sira ne’e hetan dezastre iha tasi-klaran, iha Domingu 16 Maiu 2021 oras dadersan, nia mós sai ba buka nia maluk sira ne’e iha área Metinaro to’o Manatuto, maibé lahetan no ba to’o Atauro mós lahetan.

Hetan ona vitima Rui Sarmento Martins ho kondisaun mate. Foto TOP/Marcelino Bata

To’o fali iha loron Segunda 17 Maiu 2021 iha oras tuku 6 dadersan, nia matabisu hotu kontinua ba buka nia maluk sira ne’e iha área Komoro, Likisa, Alor no atauro nian.

“Bainhira ami to’o iha ne’eba, ami konsege hetan be foer tasi nian, ho ida ne’e ami komesa tuir de’it dalan foer tasi nian ne’e. Ami to’o Cristo Rei no Hera nia kraik ami konsege hetan ona ai kabelak husi ro mout nian. Ami konsege hetan, hotu lakleur ami hetan hotu mate isin señor Rui Martins, iha tuku 9:35 ami langsung kontaktu mai diresaun komando Unidade Polisia Maritima (UPM),” hateten Mariano da Cruz ba jornalista sira iha UPM Lecidere, Dili, Segunda 17 Maiu 2021.

Sasin Mariano da Cruz. Foto TOP/Marcelino Bata

Nia hatutan, evidensia hetan maka bainhira sira to’o tasi-klaran korenti tasi nian komesa lori bee fo’er, ai-tahan entaun sira komesa tuir de’it diresaun ne’e.

“Ami to’o tiha Cristo Rei ba tan itoan ami hetan primeiru ai-kabelak ro nian, tahan rua ka tolu hanesan ne’e depois ami hetan mate-isin señor Daniel Martins no sira nain tolu seluk ami seidauk hetan,” hateten Mariano.

Unidade Polisia Maritima lori sai hela mate-isin Rui Martins. Foto TOP/Marcelino Bata

Tuir informasaun balun ne’ebé The Oe-Kusi Post (TOP) asesu, vitima ne’ebé mate ona ne’e nu’udar mós funsionariu ida serbisu iha sala emerjensia Hospital Nasionál Guido Valadares.

Matebian Rui Martins hatais hela nia uniforme serbisu nian iha HNGV./Net.

Atauro-oan nain7, pasajeiru nain 4 ho bero nain hamutuk 3 sai husi Dili ba Atauro iha loron Sabadu dader 15 Maiu 2021, no hetan dezastre iha tasi-klaran iha oras tuku 10 dadersan.

Sasin moris Moises Tome katak, hafoin hetan dezastre iha tasi-klaran, sira komesa fahe malu ona, no sira nain tolu maka konsege nani sai iha dolok oan.

Oras ne'e falta nain 3 maka seidauk hetan, no parte UPM sei kontinua buka nafatin.

Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

Jornalista