DILI (TOP) — Sidadaun hamutuk nain 7 husi postu administrativu Atauro mout lakon iha tasi klaran bainhira lori sasan sai husi Dili ba Atauro.
Xefe Suku Bikeli, Daniel Martins hateten, sidadaun nain 7 ne’e mesak mane hotu de’it, nain 4 maka sei klosan hela, no nain 3 seluk nu’udar kaben-bain.
Nia hatutan, ema nain 7 ne’e sai husi Atauro mai Dili iha loron Sábadu 15 Maiu 2021 ho susesu, no bainhira sai husi Dili ba fali Atauro maka hetan dezastre (mout) lakon tiha iha tasi-klaran ne’ebé to’o oras ne’e seidauk hetan sira nia paradeiru.
“Sira na’in hitu (7) husi Atauro ba Dili di’ak hela, sira atu fila mai Atauro maka hetan asidente iha tasi klaran, to’o agora ita seidauk hetan sira nia paradeiru iha ne’ebé, ita sei halo hela esforsu atu bele buka sira iha tasi klaran,” Xefe Suku Daniel hatete via kontaktu telemovél ba The Oe-Kusi Post, Sabádu kalan 15 Maiu 2021.
Xefe Suku Daniel ne’ebé oras ne’e iha hela Atauro hatutan, hafoin simu informasaun katak nia ema nain 7 ne’e mout iha tasi-klaran, nia mós kontaktu kedas ba Unidade Polisia Maritima (UPM) hodi ajuda buka tuir ema hirak ne’e, infelizmente to’o oras ne’e seidauk hetan sira.
“Komunidade sira husi Atauro ne’e buka ona sira lori ro komersial ne’e, hahu buka husi tuku 01:00 meudia to’o agora sei buka nafatin, seidauk hetan sira nia paradeiru loloos iha ne’ebé loos,” nia afirma.
Nia hatutan, sira nain 7 ne’e sai husi Atauro to’o Dili ho susesu, maibé depois husi Dili fila-fali ba Atauro maka hetan dezastre iha tasi-klaran ne’ebé to’o oras ne’e seidauk hetan sira.
“Sira tula hela simentu saku 50 to’o tasi klaran maka hetan dezastre. Ohin tuku lima lorokraik ha’u kontaktu ho Helikopteru konsege atu buka, maibé komu kalan ona, aban maka kontinua nafatin hodi halo opersaun ka hodi buka tuir sira”.
Nia dehan, ro Kay Rala agora sei buka hela, ro ne’e sei buka iha área Dili ba Atauro.
“Helikopteru ne’e, ohin konsege semo buka durante oras ida nia laran tanba kalan ona, sira labele halo buat ida tanba nakukun hela. Aban dadersan sira kontinua hodi bele buka tuir vitima asidente ne’e iha área tasi Dili mai Atauro”.
