DILI (TOP) – Komandu Jeral Polisia Nasionál Timor-Leste orienta ona polisia munisipiu Vikéké hodi buka tuir autor sira ne’ebé tuda-rahun kareta Sentru Saúde Uatu-Lari iha suku Afaloikai, postu Uatu-Lari, munisipiu Vikéké foin lalais.
Iha Kuarta 05 Maiu 2021 oras tuku 19:16, ekipa ambulansia sai atu tula pasiente Covid-19 hamutuk nain lima, mane 4, no feto ida, maibé to’o dalan klaran hetan asaltu husi ema deskoñsidu sira hodi tuda-rahun tiha vidru kareta ambulansia iha parte liman loos, vidru oin.
“Atuasaun polisia munisipiu Vikéké nian oras ne’e dadauk iha fatin akontesimentu ne’e hamutuk ho ekipa jestaun krize hodi identifika área ne’ebé maka akontese ba,” Portavoz Komandu Jeral PNTL, Superintendente Xefe Arnaldo de Araújo liu husi konferénsia ba imprensa iha kuartel jeral PNTL, Kaikoli, Dili Kinta 06 Maiu 2021.
“Ne’e krime, ita sei hein rezultadu investigasaun husi Komandu polisia Vikéké,” afirma komandante Arnaldo.
