DILI (TOP) – Lider Karismátiku, Kay Rala Xanana Gusmão hamutuk ho Timoroan sira ne’ebé hela iha nasaun Ingaltera sidade, Bristol no Wolchester kontinua hala’o asaun karidade hodi fó apoiu ai-han baziku no materiál kontrusaun ba vitima afetadu ba inundasaun ne’ebé akontese iha loron 4 Abril 2021.
Apoiu aihan baziku ne’e fahe direita ba vitima afetadu hamutuk 575 kompostu hosi Postu Administrativu Laclubar distribui foos hamutuk saka 100, supermie kaixa 50, mina bimoli botir 100.
Iha Postu Administrativu Manatutu Vila apoia vitima hamutuk na’in 350 kompostu foos, 30, supermie kaixa 15, mina bimoli botir 30, inklui apoiu mós materiál kontrusaun hanesan, besi kotak medida 3x5 hamutuk 5, 4x8 hamutuk 4, 4x6 hamutuk 6, 4x4 hamutuk 50 no simente saka 10, porka kaixa 12, no kalen lizu metru 20 hamutuk 150 hodi harii fila fali uma ida ba vitima difisiensia ne’ebé ninia uma mota sobu hodi halo kontrusaun foun ho medida 7x7 kompleta ho kuartu rua, sala vizita ida, sala han fatin no hariis fatin ida.
Komunidade afetadu Manatutu Vila, Etilho Salvador Santos Pereira hato’o agradese ba Lider Karimástiku Xanana Gusmão no Timoroan sira iha Inglatera ne’ebé hatudu sira nia domin hodi apoia vitima sira.
“Ami sente orgullu tebes, tanba maun boot Xanana fó ona apoiu ba ami. Tanba ami agradese depois inundasaun akontese iha loron 4 Abril no iha loron 5 Abril Avo Nana ho ekipa maka too mai fó uluk apoiu inklui harii mós uda ida ba maluk difisensia sira ne’ebé sira nia uma mota lori,” Etilho hateten ba jornalista sira iha fronteira Metinaro, Dili, Kuarta 21 Abril 2021.
Iha fatin hanesan, Eis Xefe Suku Uma-Kaduak, Manuel Agostinhos da Cunha konsidera apoiu ne’e hanesan justu domin hodi tulun vitima sira.
“Ami sente kontente, tanba Avo Nana ho apoiu liu hosi senhor Thomas do Rosario Cabral fo apoiu ba ami bainhira mosu susar no terus iha ami nia rain. Tanba so avo nana mak hele hatene ami nia preokupasaun,” nia agradese.
Deskarega sasan. Foto supplied.
Entretantu, Reprezentante Intelektuál Manatutu Anan, Gabriel Soares dehan, apoiu ne’ebé oferese hodi hakaman povu nia sorimentu no mata-been.
“Apoiu sasán hirak ne’e bele tulun no hakaman povu nia sofrimentu ne’ebé sira sofre, lakon toos, uma, sasán too lakon vida, Avó Xanana hanesan aman iha nasaun ne’e, la’ós foin ohin mak Maun Xanana hakfodak hodi fó apoiu ba ita nia povu, maibé ho maun boot nia prezensa atu lori fali esperansa ba povu hodi hamoos povu nia matewen ho tempu susar sira ne’e,” Gabriel agradese.
Antes ne’e, Ekipa Gabinente Apoiu Atividade Maun Boot, Kay Rala Xanana Gusmão ho intelektuál Manatutu anan halo ona destribuisaun apoiu aihan ba vitima afetadu inundasaun hamutuk 1.087 ne’ebé pertense ba Manatutu vila inklui suku lima (5) hanesan, Suku Uma Kaduak, Lacu Mesak, Uma Naruk, Laicore no Uma Caduak ho aldeia haat hanesan, Hahihino, Condar, Reabuticoen no Ilimanu ne’ebé pertense ba área juridisaun Postu Administrativo Laclo.
Iha Munisipiu Manatutu vitima sira ne’ebé mota lori kompostu hosi Suku Uma-Kaduak na’in na’in sia (9) no Suku Uma-Naruk ida (1).
Vitima sira ne’ebé mota lori balun hela iha uma toos laran ne’ebé besik mota ninia maka hanesan, Joana Bui Pelu, Francisco Noronha, Odete de Araújo, Madalena Gomes, Ajanu Noronha, Emilia Gomes, Marquito D. S. Pinto, Deniz Noronha, Malicau Soares no Angelino da Silva.
Vitima sira ne’ebé mota lori seidauk hetan ema na’in haat maka Emilia Gomes, Mariquitu D. S. Pinto, Madalena Gomes no, no Odete de Araújo.
Vitima sira ne’ebé mota lori no konsege buka hetan ho kondisaun sei moris maka hanesan, Francisco Noronha, Deniz Noronha, Ajanu Noronha no Milcon Soares. No vitima mota lori ho kondisaun mate ona maka Joana Bui Pelu, Angelino da Silva/Mamodo.
Tuir dasus prelimináriu hosi Governu Timor-Leste kona-ba indunasaun ne’ebé akontese iha loron 4 Abril 2021, hamate ema no lakon hamutuk 41, família afetadu 21. 676 no dezlokadu 7.246 iha lokalizasaun 31, ne’ebé ho kustu estimasaun kuaje millaun $50 ba sidadaun sira nia sasán no uma de’it.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
