Xanana no intelektuál Manatuto tulun ai-han báziku ba vitima dezastre 1.087

DILI (TOP) – Ekipa Gabinente Apoiu Atividade Maun Boot, Kay Rala Xanana Gusmão reprezenta Lider Istóriku, Kay Rala Xanana ho intelektuál Manatuto iha Dili no rai-liur kontinua hala’o distribuisaun ai-han báziku ba vítima afetadu inundasaun hamutuk 1.087 iha Munisipiu Manatuto.

Ai-han báziku sira hanesan foos, mina, supermie, ikan sardina, naan karau, susuben no sasan báziku seluk tan fahe direita ba vítima afetadu iha Manatuto vila inklui suku lima (5) hanesan, Suku Uma Kaduak, Laku Mesak, Uma Naruk, Laikore no Uma Kaduak ho aldeia haat hanesan, Hahihino, Kondar, Reabutikoen no Ilimanu ne’ebé pertense ba área juridisaun Postu Administrativo Laklo.

Administradór Postu Administrativu Laklo, Samuel Rodrigues Pereira konsidera apoiu solidaridade ne’ebé fó ba vitima sira nu’udar asaun umanu hodi tulun vitima sira hodi konsumu hodi bele ultrapasa susar ne’ebé sira enfrenta.

“Asaun solidaridade ida ne’e hetan apoiu masimu hosi kolega ekipa Lider Istóriku, Kay Rala Xanana Gusmão, amigu no jerasaun Manatutu liu-liu Laclo oan sira ne’ebé hela iha Dili,no rai liur iha hamutuk ena na’in 37 ho hanoin di’ak hodi organiza malu apoiu tuir sira idak-idak nia kbiit hodi tulun vitima afetadu sira,”Administradór Laclo Sanuel, bainhira simu apoiu umanitaria ne’e iha fronteira Manatutu no Dili, Metinaro loron Kuarta 14 Abril 2021.

Samuel hatutan, dezastre naturál ne’ebé akontese iha semana ne’e, (3-4 Abril 2021) liubá halo mota konsege lori ema na’in 10 no ema na’in haat (4) too agora buka seidauk hetan no vítima na’in haat hetan ho kondisaun sei moris, enkuantu vitima na’in rua hetan ho kondisaun mate.

Vitima sira ne’ebé mota lori kompostu hosi Suku Uma-Kaduak na’in sia (9) no Suku Uma-Naruk ida (1).

Vitima sira ne’ebé mota lori balun hela iha uma toos laran ne’ebé besik mota ninia maka hanesan, 1) Joana Bui Pelu 2) Francisco Noronha,3) Odete de Araújo, 4) Madalena Gomes, 5) Ajanu Noronha, 6) Emilia Gomes, 7) Marquito D. S. Pinto, 8) Deniz Noronha, 9) Malicau Soares no, 10) Angelino da Silva.

Vitima sira ne’ebé mota lori seidauk hetan ema na’in haat ho naran, 1) Emilia Gomes, 2) Mariquitu D. S. Pinto, 3) Madalena Gomes no, 4) Odete de Araújo.

Vitima sira ne’ebé mota lori no konsege buka hetan ho kondisaun sei moris maka hanesan, 1) Francisco Noronha, 2) Deniz Noronha, 3) Ajanu Noronha no 4) Milcon Soares. No vitima mota lori ho kondisaun mate ona ho ho naran, 1) Joana Bui Pelu no 2. Angelino da Silva/Mamodo.

Dezastre ne’e afeita estraga mós infraestrutura baziku hanesan, estrada no ponte kiik balun kotu, kanu bee moos, rin eletrisidade monu, irigasaun kotu totál, no estraga mós haree komunidade nian.

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE