DILI (TOP) — Marcos Caet ho naran jentiu Ais Tasi sai husi Rejiaun Administrativu Espesial Oe-Kusi Ambeno (RAEOA) iha loron 23 Novembru 2020 ho ro SUCCESS ba Dili no kontinua ba Lakluta, Vikéké maka lakon durante semana ida ona.
Ais Tasi (Marcos Caet) husi aldeia Hoeneno, suku Bobometu, sub-rejiaun ka postu Administrativu Oe-Silo, Oe-Kusi Ambeno. Nia lakon iha aldeia Ai-Lok, suku Ahik, postu administrativu Lakluta, minisipiu Vikéké iha loron 26 Dezembru 2020 iha oras tuku 5 dadersan to’o oras ne’e seidauk hetan.
Ais Tasi hamutuk ho nia maun boot akompaña nia oan feto ne’ebé hola mane ida husi Lakluta, Vikéké ba mane foun nia uma iha Lakluta.
“Nia lakon iha loron 26 dezembru 2020. Ami husi familia husu tulun ba PNTL no públiku atu hetan karik lori ba tiha eskuadra PNTL ka bele kontaktu ami liuhusi númeru kontaktu +670 7550 3347 no +670 7686 4367, tanba ami buka seidauk hetan,” hateten mane foun José da Costa Pinto via kontaktu telemové ba The Oe-kusi Post (TOP) Kuarta 30 Dezembru 2020.
Mane foun ne’e konta, nia hato’o ona informasaun ba iha polisia eskuadra Lakluta.
“Familia sira mai vizita iha aldeia Ailok, suku Ahik, postu Lakluta iha dadersan tuku 5:00 katuas hakfodak tanba situasaun sei nakukun ne’e mak katuas sai lakon tiha de’it to’o agora la mai fali iha uma. Ami iha uma ne’e mós seidauk hader ami sei toba hela rai sei kalan hela,” dehan mane foun ne’e.
Mane foun ne’e konta, molok Ais Tasi halai lakon, iha kalan 25 Dezembru nia la toba iha uma laran, maibé tuur de’it iha kadeira ida tau iha varanda, no iha loron 26 Dezembru dadersan familia id aba vizita sira. To’o ne’eba fan u Ais Tasi iha kadeira leten ne’e, nia hakfodak hader mai direitamente halai kedas no seidauk fila ba uma to’o ohin loron.
“Familia sira na’in rua mai fanu katuas Marcos Caet más nia dukur hela entaun katuas hakfodak halai sai tiha sira la haree tuir to’o agora la tama uma,” nia hakotu.
Iha parte seluk, Sebastião Caet nu’udar mós maun ida husi Ais Tasi (Marcos Caet) konta, nia mós informa ona situasaun ne’e ba PNTL Oe-Kusi Ambeno atu bele hatutan informasaun ne’e ba PNTL munisipiu Vikéké hodi ajuda buka tuir nia alin ne’e.
Sebastião hatutan, iha Kuarta 29 Dezembru foin lalais nia alin Ais Tasi konsege kontaktu nia iha oras tuku lorokraik katak oras ne’e nia buka hela dalan atu fila ba uma, maibé seidauk hetan dalan hodi fila, tanba nia konsege halai do’ok tiha ba foho ida iha Lakluta.
“Horseik nia telefone ami, no dehan nia agora buka hela dalan atu fila ba uma, maibé ko’alia la kleur de’it nia telefone mate tiha ona,” esplika Sebastião.
Sebastião mós konta nia alin Marcos Caet (Ais Tasi) hamutuk ho nia maun ida Domingos Caet lori nia oan feto ba mane foun nia uma iha Lakluta.
“Ha’u nia alin ne’e hamutuk ho nia maun ba antar sira nia oan feto, iha mane foun nia fatin iha aldeia Ai-Lok, suku Ahik, postu Lakluta mak halai lakon tiha ne’e”.
Nia hatutan, Ais Tasi kuaje fulan hirak nia laran sofre moras depresaun ne’ebé sempre hakfodak hela de’it.
