SAME (TOP) – Mandatu governasaun atual besik atu remata ona, maibé povu barak durante ne’e kestiona no preokupa katak, durante tinan lima (5) laiha dezenvolvimentu ida.
Preokupasaun ne’e la’os mai husi povu ain-tanan sira de’it, maibé membru governu sira rasik de’it mós sente hotu saida povu sira sente durante tinan lima nia laran.
Sekretáriu Estadu ba Asuntus Kombatentes Libertasaun Nasionál, Gil da Costa Monteiro “Oan Soru” hateten, ekipa kandidatu balun durante sira nia komisiu politika durante ne’e sempre halo akuzasaun hasoru eis Primeiru-Ministru, Kay Rala Xanana Gusmão nia governasaun durante tinan 10 nun halo buat ida, maibé Oan Soru konta husi saudozu Francisco Xavier do Amaral to’o Nicolau dos Reis Lobato monu iha kampu batalla mosu fali sobrevivente membru CCF ida, Kay Rala Xanana Gusmão ne’ebé agora ema hotu nega.
“Maibé ita povu labele nega, labele nega. Nia reorganiza hikas ita nia funu ita la’o mai to’o 1999. Ema barak ko’alia no insulta tutuir dalan sira dehan ukun tinan 10 la halo buat ida, ne’e bosok ten. Husi Dili mai Same, kareta halai lori oras rua ho balun de’it, uluk halai oras lima. Ema ne’ebé ko’alia ne’e karik nia mak halo estrada ne’e karik. Moe laiha. Sai husi Dili ba Ainaro. Uluk halai oras 4, agora lori oras rua de’it, maibé ita nega nafatin. Rai ne’e sei julga ita tutuir dalan,” Oan Soru hateten kestaun ne’e liu husi nia diskursu iha kampaña kandidatu PR José Ramos-Horta iha merkadu antigun Same, munisipiu Manufahi iha loron 07 Marsu 2022.
“Ami ukun fali durante tinan lima ne’e ami halo saida? Ami la halo buat ida, maibé ami taka nafatin dehan ami mak di’ak, povu mak sala hela de’it, koitadu. Labele sai governante, sai lideransa hodi hatete ema ki’ik mak sala, lalika sombong. Se ha’u la halo dehan ha’u la halo. La’os ha’u tenke ba justifika ho Cesta Bázica, no Uma Kbi’it La’ek (UKL). Tenke hatene moe. Ha’u hatene moe, tanba ha’u nia inan ema Same, ha’u nia aman ema Ainaro, ha’u hatene moe”.
Ministru Obra Públika (MOP), Salvador Eugénio dos Reis Soares Pires antes ne’e katak, kona-ba estrada iha territóriu tomak hamutuk kilómetru 6.000-resin, no governu anteriór to’o mai agora investe kilómetru 2.000-resin no gasta ona kuaze millaun $2 resin ba estrada de’it. Estrada ne’e konstitui husi estrada nasionál pur volta kilómetru 1.200, estrada munisipál kuaze kilómetru 900 no estrada rurál kilómetru 3.700.
MOP mós dehan, governu durante ne’e konsege halo ona estrada rurál hamutuk 700, signifika kilómetru 2.000-resin mak seidauk halo. No munisipál foin halo kilómetru 33 de’it, signifika kilómetru 700 resin mak presija halo, no estrada nasionál kuaze kilómetru 500.
Maske governu liu husi MOP aprezenta ona dadus hirak ne’e, maibé povu maioria kontinua kestiona serbisu governasaun atual hodi dehan durante tinan lima nia laran nunka sente buat ida.
