SAME (TOP) – Vise-Prezidente partidu CNRT, Gil da Costa Monteiro “Oan Soru” observa kandidatu Prezidente Repúblika (PR) balun durante ne’e halo sira nia abertura kampaña nakonu de’it ho insultu no defamasaun.
Maibé nia lakohi fó resposta ba instultu hirak ne’e, tanba tuir nia katak, lider ne’ebé gosta ko’alia no halo insultu tanba nia la iha esperansa no vizaun. Tanba ne’e mak nia gosta insulta.
“Ema balun agora komesa ko’alia insult, maibé ita la presija fó resposta. Atu hatete de’it hanesan ne’e, lider ne’ebé gosta ko’alia no halo insultu tanba nia laiha esperansa no vizaun. Tanba ne’e mak nia gosta insulta,” Oan Soru hateten kestaun ne’e liu husi nia diskursu iha kampaña kandidatu PR José Ramos-Horta iha merkadu antigun Same, munisipiu Manufahi iha loron 07 Marsu 2022.
Oan Soru hatutan, hahu husi saudozu Francisco Xavier do Amaral, Manufahi-oan, Turiskai-oan. Iha baze apoiu mosu konflitu. Saudozu Francisco Xavier do Amaral ema ka’er, futu hatama iha rai-kuak. Depois Nicolau dos Reis Lobato mak troka.
Nicolau Lobato monu iha kampu batalla, Timoroan sira tantu iha ai-laran no villa-laran laiha ona esperansa katak ukun a’an ne’e sei mosu ka la’e. Maibé, ikus mai mosu sobrevivente membru CCF ida, Kay Rala Xanana Gusmão ne’ebé agora ema hotu nega.
“Maibé ita povu labele nega, labele nega. Nia reorganiza hikas ita nia funu ita la’o mai to’o 1999. Ema barak ko’alia no insulta tutuir dalan sira dehan ukun tinan 10 la halo buat ida, ne’e bosok ten. Husi Dili mai Same, kareta halai lori oras rua ho balun de’it, uluk halai oras lima. Ema ne’ebé ko’alia ne’e karik nia mak halo estrada ne’e karik. Moe laiha. Sai husi Dili ba Ainaro. Uluk halai oras 4, agora lori oras rua de’it, maibé ita nega nafatin. Rai ne’e sei julga ita tutuir dalan,” Oan Soru afirma.
Iha fatin hanesan, kandidatu PR ba periodu 2022 to’o 2027 José Ramos-Horta katak, nia laiha inimigu ho partidu politika hotu iha rai-laran, no lakohi atu fó resposta ba defamasaun no insult sira mai husi ekipa kampaña kandidatu seluk.
“Maibé, ha’u sei fó resposta ba buat balun. Sira sei hetan resposta iha rezultadu eleisaun, husik povu mak hili no fó resposta,” katak Horta.
Horta promete, karik manan duni iha ronde dahuluk, nia sei hahu kedas halo dialogu ho partidu politika sira ne’ebé hetan asentu iha Parlamentu Nasionál hodi bele buka solusaun ba problema impase politika ne’ebé durante ne’e akontese iha rai laran.
