LAKLUBAR (TOP) — Premiadu Novel da Paz, José Manuel Ramo-Horta atual kandidatu Prezidente Repúblika (PR) ba periodu 2022 to’o 2027 hateten maske ema balun no kandidatu balun la gosta nia, maibé Horta dehan nia laiha inimigu ida ho partidu politika sira ne’ebé eziste iha rai-laran.
“Ita hahu kedas halo dialogu para hadia ita nia konstituisaun ne’ebé ke ema balun viola. Eleisaun ne’e, importante sei ita boot sira hakarak iha rai ne’e moris nafatin iha demokrasia vota (tú) loloos. Hau laiha inimigu ba partidu hotu hotu hau hakoak partidu ne’e partidu tanba ema ne’e ema,” hateten kandidatu Horta liu-husi komísiu politika iha Laklubar, munisipiu Manatuto, iha loron Sabadu 05 Marsu 2022.
“Ha’u husu ba povu Laclubar tomak, iha munisipiu Manatutu no Timor Leste iha sabadu 19 Marsu 2022. Ita vota ba númeru sorteiu 14 para hadia konstituisaun RDTL ne’ebé antes ne’e violadu,” Horta afirma.
Horta informa, iha sabadu (kalan) 19 Marsu liu loron ida ka rua hahu rona rezultadu mai kedas husi Comisaun Nasionál Eleisóens no hatene ona katak sé maka manan ba eleisaun prezidente ba periode tinan 2022 to’o 2027.
Eis prezidente ne’e esplika, partidu bele di’ak bainhira ema ne’ebé maka lidera ne’e di’ak labele dehan de’it instituisaun ida lia-fuan ne’e importante teb-tebes. Se mak halo instituisaun, se mak halo insitituisaun ema mak halo instituisaun.
“Igreja mós ema maka halo, igreja hahu husi Amu Papa to’o iha sarani sira padre sosiadade no nasaun ema no politika ne’ebé mak halo tenke hanoin ema hahu hanoin sira ne’e ki’ik liu fraku liu to’o boot sira,” nia informa.
Nia informa, sei buka hakoak sosiadade tomak, halo dialogu,tanba hahu husi dialogu maka oinsa retifika problema sira ne’ebé mak Prezidente Repúblika mak kria, Prezidente Repúblika mak halo no retigifika iregularidade iha Parlamentu Nasionál.
“Ita hare oinsa forma governu foun, govurnu foun bele forma liuhusi dialogu iha Parlamentu Nasionál ou eleisaun antisipadu laiha dalan seluk maka ne’e de’it,” nia hateten.
Iha fatin hanesan prezidente partidu Congresso Nasionál Reconstrução Timorense (CNRT) lider karismatiku Kay Rala Xanana Gusmão hateten, husu ba komunidade sira hotu vota ba númeru sorteiu 14.
“Husu ba ita bo’ot sira hotu, iha sabadu 19 Marsu 2022, vota (tú) ba númeru sorteu 14 kandidatu José Manuel Ramos Horta tenke metin nafatin,” nia hateten.
Lider karismatiku ne’e konta, iha tinan 2006 no 2007 mosu krizi ida, José Manuel Ramos Horta asumi Prezidente Repúblika hodi hamutuk ho governu ne’ebé maka iha rezolve krizi tinan rua deit.
Iha rai seluk karik krizi ne’e, sei naruk ba, naruk mai depois nia José Manuel Ramos Horta hatene konstituisaun,” Xanana esplika.
