LAKLUBAR (TOP) – Kandidatu Prezidente Repúblika ba periodu 2022-2027, José Ramos-Horta hateten, bainhira hetan vitoria iha eleisaun Prezidensial sei loke prosesu investigasaun ba ema ne’ebé bolu no autoriza membru Polisia Nasionál Timor-Leste (PNTL) ajuda no kontribui tama “sobu” rahun tiha meja Parlamentu Nasionál iha fulan Maiu tinan 2020.
“Derepente vise-prezidente ida halai tama tuur tiha meja konvoka plenaria, bolu polisia tama. Iha tempu mai ita sei investiga se mak bolu polisia ne’e mai. Se mak haruka polisia tama ba parlamentu laran,” kandidatu Horta hateten kestaun ne’e liu husi nia diskursu kampaña iha postu administrativu Laklubar, Manatuto, Sábadu, 05 Marsu 2022.
Hafoin meja PN rahun, bankada opozisaun CNRT konsidera asaun ne’e nu’udar asaltu poder ida la’os hare ba meja ne’ebé rahun, maibé violasaun Konstituisaun RDTL, LOFAP, no Rejimentu Parlamentu mak sai sentru preokupasaun ba demokrasia no valor Konstituisaun iha RDTL.
Asaun hadau no sobu rahun meja PN ne’e viola K-RDTL artigu 99 (3), LOFAP artigu 7, no RPN artigu 17&22 hodi halo asaltu poder troka INKONSTITUSIONAL no Ilegalmente PPN eleitu Arão Noe Amaral iha 19 Maiu 2020.
Maske meja PN ne’e rahun tiha, maibé ikus mai governu aprova osan hamutuk $25,000.00 hodi harii meza PPN maibé, la-signifika katak rekonsilia no restaura ona K-RDTL no lei sira ne’ebé rahun tiha ona.
Tuir KRDTL Artigu 86 (f), tuir loloos PN iha prazu loron 60 atu harii Governu foun, sura husi 17 Janeiru to’o 17 Marsu 2020. Maibe, bankada PLP, KHUNTO no FRETILIN sira la-konsege harii IX Governu tuir prazu KRDTL nian, tanba ne’e iha loron 19 Maiu 2020, Bankada tolu ne’e “hadau” de’it Meza PPN maske kontra K-RDTL no lei sira.
Timor-Leste presiza restaura fali KRDTL no Estadu Direitu Demokratiku ne’ebé hakruk ba konstituisaun no regra jogu demokrátiku, ne’ebé bankada tolu ne’e “sama rahun” tiha ona.
Hafoin remata komisiu iha postu Laklubar, kandidatu PR Horta kontinua hala’o nia komisiu iha Manatuto villa.
