ATABAE (TOP) – Partidu FRETILIN no Partidu Demokrátiku (PD) iha ona ninia kandidatura rasik, no Partidu Libertasaun Popular (PLP) mak to’o oras ne’e seidauk hateten sai atu apoiu kandidatura ida ne’ebé, maibé partidu tolu ne’e sira nia estrutura no militante sira iha baze hahu monu namtate ona hanesan has-tasak monu husi nia hun.
Lideransa masimu partidu tolu ne’e iha Postu Administrativu Atabae, Munisipiu Bobonaro deklara ofisilamente hodi afilia ba partidu Cogresu Nacional Recontrução Timorense (CNRT), lideradu Kay Rala Xanana Gusmão hodi apoiu kandidatura José Ramos-Horta iha eleisaun prezidensial tinan ida ne’e.
Deklarasaun afiliasaun ne’e hala’o aberta husi Vise-Koordenadór Partidu FRETILIN, Postu Atabae, Alberto Fontes, Koordenadór Partidu Demokrátiku (PD), Sergio Malibuti no Koordenadór Partidu Libertasaun Populár (PLP), Atabae, Carlos Verificação ho membru sira ne’ebé asiste direita husi Premiadu Nobel da Paz, Jose Ramos Horta no estrutura partidu CNRT iha Postu Administrativu Atabae Vila-Bobonaro iha loron Domingu, 20 Fevereiru 2022.
Hafoin deklara afirmasaun pozisaun politika hodi afilia ba CNRT, lideransa partidu politiku na’in tolu simu ho esturura CNRT nasionál hodi tara-tais no entrega atributu partidu CNRT hanesan Bandeira no kamizola nu’udar simbolu agradesimentu.
Vise-Koordenador FRETILIN Atabae, Alberto Fontes deklara, nia parte hamutuk ho estrutura partidu FRETILIN balun hakarak fila hamutuk ho partidu CNRT, tanba hatene katak, Xanana no Horta mak bele hadia problema iha nasaun ne’e.
Deklarasaun ida ne’e mós atu haforsa de’it deklarasaun husi Sekretariu Jeral Partidu FRETILIN Mari Bin Amude Alkatiri ne’ebé antes ne’e husu ba estrutura OPMT tomak husi baze to’o nasionál mai ho vontade ida de’it atu lori partidu CNRT hateke ba oin.
“Agradese ba partidu CNRT hodi simu ami nia afiliasaun ba loron ohin ho estrutura kuadrus no aldeia ho, ha’u agradese ba FRETILIN rona ha’u afilia mai CNRT ho kompañeiru barak hodi lori ha’u ba hasoru lideransa CPN balun, no ha’u mai hamarik ho partidu CNRT hodi lori forsa politika, hodi apoia Maun Boot Xanana hodi apoia maun boot atu ukun, so maun boot Xanana maka bele kaer ukun hodi hasai povu husi mukit,” dehan Alberto.
Nia dehan, nia parte kolabora servisu hamutuk ho estrutura partidu CNRT no grupu movimentu hotu- hotu hodi tama sai uma komunidade hodi sosializa ba povu atu vota ba kandidatura prezidente republika, José Ramos Horta no númeru surteiu 14.
“Ohin loron ita hamutuk fali ho kandidatura Dr. PR José Ramos Horta koñesidus tebes iha mundu tomak, no ita fiar nia ba presidente sei rezolve problema barak no lori investidor barak mai investe iha Timor-Leste hodi kria kampu servisu barak iha Timor-Leste. Tanba ne’e, ha’u mai hodi lori fali maun boot Xanana no maun boot José Ramos Horta atu kaer fali uku, tanab povu hein hela boot na’in rua ukun hodi rezoolve ita hotu nia problema,” nia hatete.
Iha fatin hanesan, Koordenadór Partidu Demokratiku (PD), Sergio Malibuti deklara, nia parte deside ho konsensia hodi afilia ba CNRT hodi hamutuk fali ho Xanana no Ramos Horta maka iha kapasidade atu kaer ukun.
“Ha’u husu ba estrutura postu Atabae, mai ita hamutuk hodi ita la’o bele lori nasaun ne’e ba oin. Ha’u agradese ba Dr. Jose Rmaos Horta, hau mai hosi partidu PD ho ha’u nia laran atu hamutuk ho maun boot Kay Rala Xanana Gusmão atu lori nasaun ne’e ba oin. Se la’ós maun boot Xanana, se tan mak atu lori nasaun ne’e ba oin. Agradese mós ba maun boot Dr. Jose Ramos Horta katak, ami mai ho forsa tomak hodi apoia ita boot ba presidente, tanba ne’e ha’u mai lori ema barak sei vota ba ita boot iha loron 19 Marsu agora,” nia afirma.
Iha fatin Koordenadór Partidu Libertasaun Populár (PLP), Atabae, Carlos Vereficação hato’o Agradese, tanba CNRT bele simu fali sira ho militante balun hodi apoia CNRT kaer ukun hodi hadia hikas nasaun ne’e iha setór hotu- hotu.
Nia dehan, dadaun ne’e sira nia parte konvense ona miltante partidu partidu PLP hodi muda pozisaun apoia Xanana no Ramos Horta ne’ebé sei vota iha loron eleisaun 19 de Marsu 2022.
“Ami tomak ohin deklara fila mai ho CNRT, no ami sei afirma ami nia pozisaun iha loron votasaun 19 de Marsu 2022 agora hodi vota iha maun boot José Ramos Horta no sei vota mós ba maun boot Xanana iha eleisaun parlamentar,” nia hatete.
Horta hato’o agradese no parabéns
Entretantu, Premiadu Nobel da Paz, Jose Rmos Horta hato’o agradese no parabéns ba lideransa partidu FRETILI, PD no PLP ne’ebé deside hodi afilia hamutuk ho Maun boot Xanana hodi apoia Horta ba prezidente republika.
“Ha’u agradese ba lideransa partidu FRETILIN, PLP no PD ne’ebé deside hodi mai hamutuk fali ho maun boot Xanana, ha’u simu fali todan ida hosi maun boot Xanana hodi re-kandidaan para bele hadia fali ita nia nasaun ne’e, no ha’u hato’o parabéns ba imi nia konviansa,” dehan Horta.
Horta dehan, konfiansa ne’ebé nia simu nu’udar todan boot ida, maibé Horta fiar katak, ho apoiu partidu politiku CNRT lideradu Xanana no partidu seluk tan inklui grupu movimentu hotu sei lori nia hakat liu krus todan iha eleisaun ho susesu hakat ba Palasiu Prezidente Aitarak-Laran Dili.
Iha parte seluk, premiadu nobel da Paz, Ramos-Horta mós apela ba juventude sira atu krida dame no unidade hodi evita violensia no krime labele akontese durante priodu kampañia presidensiál to’o eleisaun parlamentar.
