KAMALPUN (TOP) — Kordenador partidu Congresso Nasionál Reconstrução Timorense (CNRT) munisipiu Ermera Domingos Lemos hateten komunidade Kamalpun sei vota ba kandidatu Prêmiadu Novel Pás 1996 José Ramos Horta hodi nune’e lori Timor-Leste ba Mundu Internasionál, tanba durante tinan lima nia laran, Timor-Leste izola aan tiha husi komunidade internasional.
“Nune’e loke ita nia vizaun ida, hili prezidente ne’ebé maka tenke matenek, Prezidente ne’ebé mak bele lori Timor-Leste ba mundu,” Kordenador partidu Congresso Nasionál Reconstrução Timorense (CNRT) Munisipiu Ermera, Domingos Lemos hateten liu husi nia diskursu iha konferénsia nasionál Union dos Movimentos Democráticos e Patrioticas (UMDP) iha aldeia Kamalpun, suku Liho, Postu Administrativu Rai-Laku, Munisipiu Ermera iha loron Segunda, 21 Fevereiru 2022.
Lemos konsidera figura Horta ne’e pertinente tebes atu lori Timor-Leste ba mundu hanesan ho lema GMNTV dehan lori Timor ba mundu ne’e, maibé Prezidente agora lori Timor husi Ai-Tarak Laran ba Fárol Timor-Leste nia naran ba Fárol de’it.
“Iha dia 19 Marsu ne’e ita sei julga sira lalika fó votu ba sira, ita fó votu ba númeru sorteiu 14 hodi bele lori Timor-Leste ba mundu, la’os lori fali ba Farol de’it”.
Lemos husu ba Horta atu sura mós ho partidu CNRT nia ema sira iha munisipiu Ermera sira nia apoiu tomak ba nia hodi hetan vitoria ba iha eleisaun prezidensial ne’ebé sei akontese iha loron 19 Marsu tinan ida ne’e.
“Tanba ita boot nia kandidatura liu-husi konferénsia nasionál partidu CNRT iha loron 23 liubá ho votasaun unimidade. Klaru katak ita boot nia kandidatura ami nia kandidatura mós iha konferensia nasionál estrutura munisipiu, postu administrativu suku no aldeia,” nia hateten.
“Ami halo ami nia programa konsolidasaun partidu nian ba to’o iha baze lia-fuan seluk ne’ebe mak ami rona husi komunidade mak avo Nana no Avo Ramos-Horta. Hili avo Ramos-Horta iha loron 19 Marsu”.
“Sira tonka malu halo ema terus durante sira nia mandatu tanba ida ne’e mak ami simu afiliasaun husi partidu FRETILIN, PD kada loron sira sempre kontaktu ami hodi halo afiliasaun apoiu kandidatura maun José Ramos-Horta iha periodu 2022-2027”.
“Ita bele dehan katak masa real partidu CNRT iha Munisipiu Ermera hamutuk nain 20 mill la dúvida ba José Ramos-Horta hodi lori Timor ba mundu,” Kordenador partidu Congresso Nasionál Reconstrução Timorense (CNRT) Munisipiu Ermera, Domingos Lemos hateten ba komunidade sira iha aldeia Camalpun, suku Liho, Postu Administrativu Rai Laco Munisipiu Ermera, segunda 21 Fevereiru 2021.
Nia hatutan, movimentu sira lori tan masa mai, partidu seluk lori tan masa mai ne’ebé makas tebes hotu-hotu hamutuk konsilida nafatin hodi vota nafatin ba José Ramos -Horta.
“Ita hotu esforu ba primeira ronde tanba ita nia hakarak ezije sé mak ita kandidata tenke esforsu atu nune’e ita nia kandidatura bele manan iha primeira ronde hodi rezolve ita nia situasaun iha rai-laran, tanba situasaun rai-laran halo nasaun sira iha mundu hateke mai la hetan demokrásia iha Timor-Leste, mundu hateke mai la hetan ona”.
Enretantu kandidatu prezidente José Ramos-Horta hateten, nia parte lakohi ko’alia barak kona-ba violasaun konstituisaun.
“Tanba ita boot sira rona tiha ona rajaun saida mak ha’u bele kandidatu aan. Rajaun saida mak avo Nana tau ha’u kandidatu ba Prezidente Repúblika,” nia hateten.
Horta dehan eleisaun mai ne’e, monu iha loron 19 Marsu importante hotu-hotu hili nu’udar sidadaun ne’ebé mak iha direitu obrigasaun atu hili ba Prezidente Repúblika lalebe falta
tanba ne’e demokrasia ida-idak hili ba kandidatu ne’ebé mak di’ak liu.
