Iha fatin hanesan koordenador suku Triloka José Aleixo Borgés hateten, suku Triloka kompostu husi aldeia haat hanesan aldeia Lequi Loi Wato, Bado ho’o, Makadoi no Aubaka nia garantidu sira ne’ebé deside atu apoiu Partidu CNRT.
“Ha’u nia garansia sira ne’ebé deside hakarak apoiu ba lider karizmatiku Kay Rala Xanana Gusmão iha suku Triloka no ba militante no simpatizante sira bem vindu ba ita hotu. Ha’u hanoin nia labele ko’alia barak hatudu de’it partidu militante durante tinan barak moris iha suku Triloka”.
Nia esplika, nia hakarak fó hatene katak partidu CNRT moris iha suku Triloka iha tinan 2007. Hamutuk votantes 119 no iha tinan 2012 estrutura suku Triloka nia esforsu konsege atinji votante hamutuk nain 483, no ba fali tinan 2017 ema konsege sobu sira nia estrutura hela deit votante 240.
“Ohin ha’u apresia no kontente teb-tebes maluk juventude sira nia programa ida ami hakarak sai apoiante ba partidu CNRT no ha’u agradese tebes no kontente. Ho ha’u nia agradese ida ne’e ha’u hakarak fó razaun tanba nain hira ne’e bele ajuda ona ha’u nia estrutura ema sira ne’ebe mak sobu nain hirak bele hamutuk fali mai hodi ita serbisu hamutuk ba partidu CNRT”.
Koordenador suku Triloka dehan, se karik afiliante na’in 233 ne’e aumenta tan total votante iha suku Triloka hamutuk 1444 liuhusi esforsu hotu bele fahe ba rua ka bele mós manan CNRT karik konta ho afiliante sira nia esforsu. Maibé, nia fiar sira ne’ebé mak tur iha fatin ida ne’e, uluk la’os Partidu CNRT.
“Agora mai hamutuk ona ho ami husu de’it ba Maromak para ita bele manan iha eleisaun ne’e se karik afiliante hotu mai ho fiar ba partidu CNRT”.
Nia husu, ba estrutura no juventude sira ne’ebé mak mai apoiu tenke matan moos no neon-nain atu hotu-hotu serbisu hamutuk hodi bele manan iha festa demokrasia ida ne’e.
“Se karik ita hotu mai ho fuan, mai ho laran entaun ita fó fiar ba maun Xanana, más kuandu ita mak mai la ho fuan-laran ita mak bosok maun Xanana hanesan mós ita bosok rai lulik Timor-Leste ida ne’e”.
Tuir reprezentante membru CDN partidu CNRT António da Costa “Derok Masin” katak, halibur hamutuk iha fatin ida ne’e atu hamaran matan been ne’ebé governu halo ema barak tanis durante ne’e. La’os ne’e deit maibé, atu kore-talin ida ne’ebé kesi iha inan ida nia kakorok ne’ebé mate tanba hahan laiha hodi fó han ba oan sira.
António da Costa “Derok Masin”. Foto TOP/Marcelino Bata.
“Imi labele husu tan hahalok ida ne’e, tanba hahalok ida ne’e mai husi ukun nain sira ne’ebé ukun dadauk, hahalok ne’e governu ne’ebé ukun ita ne’e,” nia hateten.
Nia hatutan, nu’udar membru CDN nia hambrik iha ne’e atu ko’alia politika iha motivu rua ne’ebé loke ba atu rona iha leten ne’ebá ko’alia de’it politika diplomasia. Ho lia-fuan simples karik lian saboko, politika saboko ne’e ko’alia taka ho karau-kulit.
“Maibé, ba ha’u la iha motivu rua ne’e tenke loke ba ema hotu atu rona sala ne’e sala, loos ko’alia loos de’it”.
“Razaun tinan lima sira ukun ita mós terus tinan lima. Partidu CNRT nia politika mak estrada ida sa’e mai ne’e, se mak halo maun boot Kay Rala Xanana Gusmão iha partidu CNRT mak halo”.
Nune’e mós, Vise Prezidente Partidu CNRT Frnscisco Iku lai afirma, partidu CNRT hamutuk halo dezemvolvimentu ba povu ida ne’e, tanba ne’e husu bai nan-aman sira, joven sira atu labele fó votu arbiru ba partidu seluk.
Francisco Iku Lai.
“Kuandu maun boot Xanana mak fó apoiu ba maun boot Ramos Horta, hili la sala tanba lider ida ne’e merese duni maun boot Xanana bolu ba hatur iha Palasiu Prezidensial Ai-tarak laran”.
Nia hatutan, merese povu Timor-Leste fó votu ba nia duni. Mundu rekoñese nia Timoroan nusa mak la suporta fó votu ba nia.
“Nain hirak ne’ebé tur ona iha oin ne’e, imi nia fuan tau ona iha kandidatu Prezidente José Ramos Horta, imi mai ne’e, imi mós hare ona buat ruma naksalak duni, buat ruma laloos duni iha ukun ida ne’e, imi mai ne’e imi mós la’os hakat arbiru atu mai iha partidu ida ne’e”.
Nia dehan, tanba partidu la fó buat ruma, partidu halo de’it dezemvolvimentu ba rai ida ne’e, ba povu nia moris maibé partidu CNRT hatudu ona, halo ona dezemvolvimentu ba rai ida ne’e.
“Dezastre akontese iha kapital Dili, Prezidente Repúblika ne’e kadeira kesi metin iha fatin. Maun Xanana la’os prezidente no la involve iha governasaun tun direita ba iha fatin dezastre natural sira ne’ebé mak sofre hodi ajuda ita nia inan aman sira,” nia informa.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
