BUILE (TOP) – Kandidatu Prezidente Repúblika atual premiadu nobel ba paz 1996, José Ramos-Horta husu ba povu tomak iha rai-laran liliu komunidade sira iha aldeia Buile, suku Bahu, postu administrativu Baukau villa, munisipiu Baukau atu lalika tauk bainhira nia disolve Parlamentu Nasionál (PN), funu sei la mosu ida iha rai-laran.
Durante ne’e mosu propaganda politika husi parte balun katak, bainhira Horta manan eleisaun prezidensial no hakat ba disolve PN sei mosu kedas funu boot iha Timor-Leste, maibé Horta desmente no rejeita assuntu ne’e, no konsidera assuntu ne’e nu’udar propaganda baratu husi nia adversariu politika sira iha rai-laran.
"Ha'u husu ba povu tomak atu labele paniku ho lia-fuan krize ne'ebé mak ha'u nia tiun (deputadu) balun iha Parlamentu Nasionál hatete, se eleisaun antisipada mosu atu kria krize, ne'e ba ha'u (eleisaun antisipada) buat ida normal mosu atu hadi'a rai nasaun ne'e," Horta deklara lia hirak ne'e bainhira partisipa seremonia konsolidasaun forsa politika dinamiza no apoiu kandidatu husi partidu CNRT ba Prezidente Repúblika iha aldeia Buile, suku Bahu, postu Baukau Villa, munisipiu Baukau, Kuarta 16 Fevereiru 2022.
Horta hatutan, bainhira hetan konfiansa total husi vontate soberanu povu nian iha eleisaun prezidensial ne’e, nia sei halo uluk komunikasaun ho partidu politiku sira ne’ebé hetan asentu parlamentar sira hotu, akademiku, sosiedade sivil inklui sosiedade konfiksaun relijioza sira hotu hodi fó ka tau hanoin hamutuk hodi solusiona krize politika ne'ebé la'o kuaze besik ona tinan lima (5) nia laran, hodi fó impaktu direita ba povu rai ida ne'e nia futuru.
Horta mós agradese ba povu Baukau ne'ebé deside aan mai hamutuk iha partidu CNRT hodi fó fiar ba nia atu kandidata hikas nia aan ba Prezidente Repúblika hodi bele hadi'a nasaun no bele salva nasaun ne'e labele kontinua monu nafatin ba iha krize politika no ekonomia.
"Avo Nana fó responsabilidade boot ida ne'e mai ha'u, ha'u hatene ita sei hasoru dezafiu oioin iha planu nasionál, rejionál no internasional ne'ebé nia impaktu boot tebes ba ita nia situasaun rai-laran. Ha'u la kritika ita nia prezidente Lú Olo nu'udar kombatente ida iha FRETILIN, maibe prezidente Lú Olo hamosu hela impasse ne'ebé nia abut hahu iha Aitarak-Laran hodi da'et to'o iha Parlamentu Nasionál," Horta afirma.
Horta rekoñese, Xanana iha legacy boot durante nia governasaun, tanba konsege halo progresu maka’as iha prosesu harii Estadu no governu, tanba governu hadi'a ona estrada iha territóriu laran maski balun ka itoan de'it mak seidauk, dada eletrisidade husi nasionál ba iha suku no aldeia sira maski sei hela porsentu itoan mak seida'uk asesu, hadia ka kapasita rekursu umanu ne'ebé mak Fundu Dezenvolvimentu Kapital Umanu (FDCH) mak toma konta.
