BUILE (TOP) – Koordenador Partidu Libertasaun Popular (PLP) munisipiu Baukau, Aderito Domin desidi ona hodi apoiu kandidatu Prezidente Repúblika period 2022-2027, José Ramos-Horta, la’os apoiu Isabel da Costa Fereira ne’ebé nu’udar mós kandidatu ida.
Aderito Domin hateten, nia sei halo esforsu tomak hodi mobiliza populasaun Baukau tantu husi militante partidu FRETILIN, liliu husi Partidu Libertasaun Popular (PLP) nian atu mai hamutuk apoiu Kay Rala Xanana Gusmão no José Ramos-Horta ho razaun prinsipal katak, fó fiar hikas ba lider nasionál na'in rua ne'e hodi bele hadi'a hikas krize politika no ekonomia iha rai-laran.
Koordenador PLP munisipiu Baukau ne’e rekoñese governasaun atual ne’ebé lidera husi Prezidente PLP atual Primeiru-Ministru, Taur Matan Ruak hatudu malorek nia inkapasidade hodi la konsege rezolve problema sosial sira durante ne’e, maibé haterus de'it povu durante iha ninia mandatu, tanba povu sempre halerik la iha osan, hahan, bee moos no seluk tan iha ukun ida ne'ebé mak partidu FRETILIN sai ai-tonka ka mai ho ninia politika ambisaun hanaran viabiliza.
"Ami hanoin katak, agora ne'e tempu ba maun boot Xanana no maun Ramos-Horta bele hamutuk atu hadi'a hikas nasaun no povu nia vida, tanba ne'e mak ohin ami deklara ho nakaloke ba públiku katak hahu agora ba oin ami sei apoia maun boot Xanana no nia alin Ramos-Horta," Aderito Domin deklara lia hirak ne'e bainhira partisipa iha atividade konsolidasaun forsa politika dinamiza no apoiu kandidatu husi partidu CNRT ba Prezidente Repúblika iha aldeia Buile, suku Bahu, postu Baukau Villa, munisipiu Baukau, Kuarta 16 Fevereiru 2022.
Entretantu, Isabel da Costa Ferreira nu’udar fen-kaben husi Primeiru-Ministru, Taur Matan Ruak mós hetan ona sertifikasaun husi Tribunal Supremu Justisa (STJ) nu’udar kandidata PR ba periodu 2022-2027 ho nia númeru sorteiu iha bulletin votu númeru 1, no José Ramos-Horta iha númeru 14.
