BUILE (TOP) – Alarico Daitula nu’udar oan mane mesak husi saudozu Komandante David Alex Daitula husu ba komunidade sira iha aldeia Buile, suku Bahu, munisipiu Baukau ne’ebé durante tempu rezistensia subar nia aman iha fatin ne’e atu vota ba kandidatu José Ramos-Horta, tanba tuir nia katak, so Komandante em Xefe das FALINTIL, Kay Rala Xanana Gusmão ho José Ramos-Horta de’it mak bele restaura hikas konstituisaun RDTL ne’ebé durante ne’e hetan violasaun maka’as.
“Agora ne'e tempu ba maun boot Xanana no nia alin Ramos Horta ba ukun hodi hatu'ur hikas fali orden konstituisional ne'ebé politiko má fe sira sobu no estraga tiha ona, no mòs bele hatu'ur hikas fali lejitimidade no dignidade orgaun Parlamentu Nasionál ne'ebé partidu ambisiozu PLP, FRETILIN no KHUNTO sira halo asaltu poder hodi sobu orgaun ida ne'e iha loron 19 Maiu 2020,” Alarico Daitula deklara lia hirak ne'e bainhira partisipa atividade konsolidasaun forsa politika dinamiza no apoiu kandidatu husi partidu CNRT ba Prezidente Repúblika iha aldeia Buile, suku Bahu, postu Baukau Villa, munisipiu Baukau, Kuarta 16 Fevereiru 2022.
Alarico dehan, iha nasaun doben ida ne'e so iha lider na'in rua maun boot Xanana no Ramos Horta mak bele restaura hikas fali lejitimidade no funsionamentu normal orgaun governu ne'ebé dezde 2020 la funsiona ho di'ak ka normal ne'ebé rezulta ekonomia rai laran hakdasak ba beibeik.
"Husu ba povu Baukau tomak, ita boot sira bele dada Bandeira FRETILIN, PLP, KHUNTO no partidu seluk nia bandeira iha uma oin, maibé ita boot sira tenki vota ba kandidatura Ramos-Horta ne'ebé mak maun boot Xanana rasik apoia no konta mós ho ita hotu nia apoiu," Alarico rekomenda.
Kay Olo, oan mane husi Komandante em Xefe das FALINTIL, Kay Rala Xanana Gusmão entrega bandeira CNRT ba militante sira husi partidu seluk iha munisipiu Baukau foin lalais./Net.
Alarico observa, durante governasaun iha oitavu governu konstitusional lidera husi Primeiru Ministru Taur Matan Ruak no tonka husi FRETILIN nunka halo programa di'ak ruma hodi lori ka hadi'a fali nasaun ne'e nia ekonomia ne'ebé mak monu hodi hamosu impasse politika la'o naruk durante jeneral Taur Matan Ruak nia ukun.
Iha fatin hanesan, Vise Prezidente Partidu CNRT, Tomas do Rosario Cabral dehan, agradese ba esforsu tomak ne'ebé mak autoridade lokal Baukau sira halo hodi hahu organiza povu suku Bahu no povu suku Bukoli hodi deklara hamutuk ho partidu CNRT lidera husi Kay Rala Xanana Gusmão.
"Ita nia Estadu ida ne'e la'o la forte no la funsiona ho di'ak, tanba ne'e maka maun boot Xanana deside hili fali maun Ramos-Horta hodi kria fali programa hodi funsiona fila fali ita nia Estadu ida ne'e ho di'ak liutan bainhira hetan fiar husi povu ka eleitu duni hodi sai Prezidente Repúblika," deklara Tomas.
Povu Timor Lorosa'e tenki apoiu Kay Rala Xanana Gusmão ho Ramos Horta, tanba bainhira fó apoiu ba lider na'in rua ne’e mak sei iha oportunidade atu hadi'a fila-fali interese nasionál ka hadi'a fali povu nia moris ne'ebé mak durante besik tinan lima (5) hakdasak ba beibeik.
"Maun boot Xanana no maun Ramos Horta sei harii fila fali estadu sai metin no sei defende nafatin rai no povu ne'e nia direitu iha mundu internasional (fronteira marritima)," Tomas argumenta.
Hafoin halo dialogu ho komunidade sira ne'ebe inklina aan iha grupo forsa politika no dinamiza iha Baukau Villa, Vise Prezidente Partidu CNRT ho ekipa sira kontinua desloka ba suku Bukoli hodi entrega atributu partidu hanesan ropa no bandeira ba responsavel komunidade Bukoli, Mario Quintao ho populasaun balun ne'ebé deside apoia Kay Rala Xanana Gusmão no José Ramos-Horta.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
