BUILE (TOP) – Kandidatu Prezidente Repúblika ba periodu 2022-2027, José Ramos-Horta husu ba povu sira iha suku Bahu no Bukoli, munisipiu Baukau katak, oras ne’e iha figura boot rua mak sei hadau malu votu FRETILIN nian, tanba ne’e nia sujere vota ba nia de’it hodi Evita hirus malu entre kandidatu Lere Anan Timur ho kandidatu Francisco Guterres Lú Olo.
Horta ho oin midar esplika ba povu sira iha munisipiu Baukau katak, oras ne’e jeneral reformadu ho deviza fitun tolu Lere Anan Timur no kandidatu Prezidente Partidu FRETILIN, Francisco Guterres Lú Olo mak kompete malu makas hodi hadau malu votu militante partidu FRETILIN nian. Nune'e, atu bele netraliza hodi sira labele hirus malu di'ak liu votu fo fali ba nia tanba nia mós ema FRETILIN, maibé ida netral ka moderadu.
"Lere no Lú Olo hadau malu votu FRETILIN nian, tanba ne'e mak ha'u husu di'ak liu kalma, ha'u bele netraliza sira na'in rua iha FRETILIN,” Horta esplika ho jestu komiku no hamnasa bainhira partisipa iha atividade konsolidasaun forsa politika dinamiza no apoiu kandidatu husi partidu CNRT ba Prezidente Repúblika iha aldeia Buile, suku Bahu, postu Baukau Villa, munisipiu Baukau, Kuarta 16 Fevereiru 2022.
