ERMERA (TOP) – Sekretariu Jeral partidu FRETILIN, Mari Bin Amude Alkatiri ne’ebé sai husi Timor desde loron 29 Dezembru 2021 to’o ohin loron seidauk fila ne’e gaba nia Prezidente partidu FRETILIN, Francisco Guterres Lú-Olo nu’udar figura mundial ida no koñesidu iha mundu internasional maske assume kargu Prezidente Repúblika durante tinan lima ladun hala’o vizita ba rai-liur.
Alkatiri dehan, Prezidente Repúblika Francisco Guterres Lu Olo ema ne'ebé matenek no koñesidu iha mundu internasional, tanba bele re-kandidata aan ba mandatu dala ida tan hodi defende determinasaun no independensia rai ida ne'e nian.
"Nu'udar sekretariu jeral no lider Fretilin, ha'u hato'o felisitasaun ba desizaun iha tempo ida ne'e no hatudu matenek hosi Prezidente Repúblika Francisco Guterres "Lu Olo" hodi rekandidata aan ba mandatu ida tan iha funsaun hanesan, ne'ebé ezerse hela ho determinasaun no independensia," hatete sekjer Fretilin Mari Bin Amude Alkatiri iha nia mensajen ne'ebé le’e sai husi adjunto sekjer José Reis iha Ermera, Domingu 16 Janeiru 2022.
Tanba ne'e nia reafirma, FRETILIN apoiu total ba desizaun ne’e no prontu serbisu ho meius tomak hodi garante katak kandidatu ne’e sei manan iha eleisaun prezidensial tinan ida ne'e.
"Ha'u afirma, FRETILIN nia apoiu politiku institusional tomak ba rekandidata ida ne'e, FRETILIN prontu atu tau makina no meius ne'ebe hosi FRETILIN nu'udar parte apoiu inklui atributo sira hodi garante apoiu total, apoiu ne'ebe meresidu no nu'udar direito rasik hosi kandidatu Lú Olo.
Maske sei iha rai-liur hela, Alkatiri dehan nia sei halo esforsu tomak hamutuk ho kuadru no militante partidu hahu movimentu ho entendimentu ne'ebé luan, boot liu no nakloke ba entidade hotu la hare ba husi kor politiku ne'ebé de'it.
"Ha'u sei halo esforsu tomak hodi halibur kuadru no militante FRETILIN sira hotu iha apoiu ida ne'e, hodi hahu movimentu ho dinamika klaru hodi loke fatin sira ba konstrusaun plataforma entendimentu ida ne'ebé luan liu, inkluzivu no ho karater nasionál, la hateke ba kor filiasaun politiku partidariu husi apoiante ida-idak".
"Ha'u hato'o ba kandidatu Lú Olo dezeju susesu iha serbisu ba patria no ba povu. Kandidatu Francisco Guterres "Lú Olo" ne'ebé aprezenta nia kandidatura ho baze iha valor no prinsipiu sira ne'ebé hun no abut uluk fó mahon no kbi'it ba luta, no ohin loron harii ponte sira ba unidade ho objetivu ba libertasaun povu nian".
