DILI (TOP) – Bilionariu no fundador Alibaba, Jack Ma husi Repúblika Popular China (RPC) ajuda tan ona ekipamentu no materiál protesaun individual ba protesaun virus corona (Covid-19) mai Timor-Leste.
Apoiu ekipamentu sira ne’e tula iha aviaun charter TRI-MJ husi Singapura to’o ona iha rai-laran Tersa horseik lorokraik.
Sasan sira ne’e kompostu husi máskara rihun 130, luvas médiku rihun 20, ekipamentu protesaun pesoál rihun lima, protesaun oin rihun 5010, ekipamentu deteksaun rihun 5010, reajente ba purifikasaun rihun 5040, reajente ba prezervasaun amostra rihun 5000, termómetru 39 no ventiladór 10.
Ministru Negósiu Estranjeiru no Kooperasaun (MNEK), Deonísio Babo, ne'ebé simu diretamente materiál hirak ne'e, iha Aeroportu Internasionál Nicolau Lobato, agradese apoiu ne'ebé oferese husi Fundasaun Jack Ma no Alibaba liuhosi Embaixada Xina iha Timor-Leste nune'e bele ajuda nasaun ida ne'e iha luta kontra COVID-19 ne'ebé sai hanesan krize saúde públika.
Embaixadór Xina iha Timor-Leste hateten hanesan amigu diak, Governu Xina prontu atu kontinua fó apoiu ba Timor-Leste liuhosi doasaun ekipamentu no materiál protesaun pesoál hodi kombate COVID-19 iha Timor-Leste.
Apoiu ida ne'e hanesan doasaun daruak husi Xina ba Timor-Leste hahú kedas iha inísiu surtu COVID-19 iha Timor-Leste.
Antes ne'e, Governu Xinés mós oferese ona ekipamentu no materiál protesaun individuál ba Timor-Leste hodi responde ba surtu COVID-19 iha rai laran.
Notisia relevante: Máskara 82.000 ba TL Taka Ibun-Inus.
