Oekusipost.com Dili – Governu Repúblika Popular China ajuda ona fasilidade sira hanesan máskara hamutuk 82.000 ba Timoroan sira taka i nus no ibun hodi hado’ok a’an husi moras virus corona (COVID-19).
Tuir komunikadu ba imprensa ne’ebé Oe-Kusi Post asesu, ajudu ne’e akontese, tanba esforsu husi governu liu husi Ministériu Negósiu Estranjeiru no Kooperasaun (MNEK) desde loron 28 Janeiru 2020. Depois doasaun ba dala uluk nian ba ekipamentu médiku, ne’ebé inklui kâmara imajen térmika hodi halo monitorizasaun ba temperatura isin ne’ebé fó tiha ona iha loron 4 Marsu liuba.
No Tersa ohin 28 Abril 2020, aviaun komersial Indonézia Citilink to’o iha aeroportu internasional Prezidente Nicolau Lobato Komoro iha oras tuku 3 lorokraik lori tan máskara 82.000 ne’e kompostu husi máskara baibain hamutuk 42.000, no máskara ho marka KN95 hamutuk 40.000. Máskara KN95 ne’e mak durante ne’e governante sira no ema boot sira iha Timor-Leste uja. Prosesu apoiu máskara ne’e mós fahe kedas ba klase entre klase ki’ak rabat rai no klase ba ema boot sira.
Aviaun ne’e mós la’ós lori máskara de’it, maibé lori mós sasan sira seluk hanesan 4400 aventais ba protesaun, vizeira sira hamutuk 4.440, kapa ba sapatu sira hamutuk 4400, luvas ba médiku sira hamutuk 5000, termométru hamutuk 80, no ventilador ne’ebé bele lori ba-mai (portable) hamutuk 90.
Entretantu, Dotora Odete da Silva VIegas to’o oras ne’e sei iha ema hamutuk nain 206 sei hein hela rezultadu teste laboratóriu ne’ebé antes ne’e hasai tiha ona, no ohin Tersa ohin kazu foun laiha.
Nia hatutan, total ema ne’ebé tuir teste ona hamutuk 597 (horseik iha 480), total rezultadu laboratótiu pendende hamutuk 206 (horseik iha 89). Total kazu konfirmadu mantein 24. Husi total ne’e, nain 2 positivu sai tiha ona, no nain 4 ne’ebé kategoria kazu provavel mós sai tiha ona.
“Total kazu teste laboratóriu negativu hamutuk 367. Total profisional saúde iha kuarentena iha ema nain 40. Total ema ne’ebé sei hela iha kuarentena obrigatóriu hamutuk 411 (ema nain 363 mak iha Dili, no nain 294 iha munisipiu sira). Auto-kuarentena iha Dili hamutuk 48, no ema nain 40,” hatete dotora Odete liu husi konferensia ba imprensa iha Sala Situasaun Sentu Integradu ba Jestaun Krize iha Sentru Konvensaun Dili, Tersa 28 Abril 2020.
Nia hatutan, ema hamutuk nain 1702 mak liu ona kuarentena obrigatóriu, husi Dili nain 1357, no munisipiu sira nain 345.
