DILI (TOP) – Hafoin eis Primeiru-Ministru atual Prezidente Partidu CNRT, Kay Rala Xanana Gusmão foin hakat tama ba aviaun laran iha aeroportu internasional Prezidente Nicolau Lobato iha loron Kuarta 03 Maiu 2023, mosu kedas informasaun falsu sira iha plata forma media sosial (Facebook) ho narasaun Kay Rala Xanana Gusmão halai ona ba rai-liu hodi halo tratamentu, tanba sofre moras ruma.
Informasaun loloos mak Prezidente Partidu CNRT, Kay Rala Xanana Gusmão nia viajen ba rai-liur, liliu ba Cambodia atu simu premiu ka rekoñesimentu Honoris Causa husi American University of Cambodia. La’os tanba moras, no la’os atu abandona atividade kampaña mak semo ba rai-liur, maibé Xanana ninia viajen ba Cambodia ne’e atu simu premiu ida ne’ebé sei partisipa husi lider barak husi bloku ASEAN nian.
Maske ajenda politika oras ne’e la’o namanas tebes, maibé Xanana konsidera no respeita tebes desijaun American University of Cambodia ne’e, ikus mai nia tenke pauza hela ninia atividade kampaña partidu CNRT nian hodi desloka ona ba rai-liur iha loron Kuarta 03 Maiu 2023.
Rajaun no objetivu deslokasaun Xanana nian ba rai-liur la’os atu ba simu de’it titulu Honoris Causa husi American University of Cambodia, maibé sei hasoru malu mós ho Primeiru-Ministru Cambodia, Hun Sen ho ninia ministru sira balun inklui Sekretariu Jeral ASEAN nian, hodi deskuti kona-ba adezaun Timor-Leste ba ASEAN.
“Uluk nanain ha’u hakarak rejeita kedas agora, tanba ha’u le’e iha media sosial ema barak ko’alia dehan Avo Nana sai ona ba rai-liur, tanba moras. Balun dehan tanba halo kampaña barak be nia desmaia tiha. Ne’e bosok ten hotu. Laloos ida,” hateten Sekretariu Jeral Partidu CNRT, Dato Sri Francisco Kalbuadi Lay durante nia diskursu iha mini-kampaña partidu CNRT nian iha postu Rai-Laku, Ermera, Kinta 04 Maiu 2023.
Eis Primeiru-Ministru, Kay Rala Xanana Gusmão simu husi autoridade Cambodia nian iha aeroportu./Net.
“Sira rona de’it Avo Nana atu ba rai-liur hodi simu premiu, sira mak desmaia tiha sira dehan fali avo. La buat ida husik ba, ita la ba liga buat ki’ik-oan sira hanesan ne’e. Ha’u atu dehan de’it, avo ba duni horseik, ha’u ho Kay Olo ba to’o aeroportu despde avo iha ne’eba. Mai ita hotu hasa’e ita nia orasaun ba avo atu bele fila mai Timor ho di’ak”.
Eis Ministru Turizmu ne’e hatutan, Cambodia tinan ida ne’e sai nu’udar uma nain ba eventu SEA GAMES nian, no abertura ba SEA GAMES ne’e sei partisipa husi lider ASEAN tomak inklui Prezidente Partidu CNRT, Kay Rala Xanana Gusmão mós partisipa hotu iha kapital Phnom Penh.
Tuir Planu, Xanana sei fila hikas mai Timor-Leste iha loron 08 Maiu 2023, hodi kontinua kampaña partidu CNRT nian iha Aileu to’o remata.
“Sekjer favor hameno hela ba ita nia militante no simpatizante sira, estrutura, fiskais, selkom, nurep, postu no munisipiu hotu, estrutura nasionál atu tenke hakmatek, kria nafatin paz no estabilidade, hadomi malu ho ema hotu,” Sekjer CNRT hato’o mensajen husi Prezidente Partidu CNRT, Kay Rala Xanana Gusmão ba militante no simpatizante sira iha rai-laran.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
