PHNOM PENH (TOP) – Lider sira iha rejiaun Association of Southeast Asian Nations ka Assosiasaun Nasaun Sudeste Asiátiku (ASEAN) kuaje maioria fiar katak, partidu CNRT ne’ebé lidera husi Kay Rala Xanana Gusmão sei manan iha eleisaun parlamentar tinan ida ne’e. Tanba ne’e, sira laiha dúvida konvida lider karismátiku ne’e hodi hahu ona halo diskusaun kona-ba kooperasaun bilateral sira ho Timor-Leste iha área oioin.
Ijemplu ida mak, Primeiru-Ministru Cambodia, Samdach Hun Sen antes ne’e hato’o ona konvite ofisial ba Prezidente Partidu CNRT, Kay Rala Xanana Gusmão atu disponivel karik bele hala’o netik vizita ida ba kapital Phnom Penh molok eleisaun parlamentar hahu.
Hatan ba konvite ne’e, Xanana tenke husik hela ninia tempu ne’ebé nakonu tebes ho ajenda kampaña politika partidu CNRT nian hodi desloka ba Phnom Penh atu bele hametin liutan kooperasaun bilateral entre rai-rua nian.
Xanana konsidera konvite husi PM Hun Sen ne’e nu’udar interese nasionál, no tanba interese nasionál Xanana tenke husik hela nia atividade kampaña hodi desloka ba Cambodia. Ida ne’e lahanesan ho sira ne’ebé husik hela ka abandona tiha serbisu governu nian ba halo kampaña buka votus iha teritóriu nasionál hodi sakrifika povu sira susar tebes atu sosa pulsa eletrisidade, susar atu halo pasaporte no seluk tan.
Prezensa Xanana iha Phnom Penh la’os de’it hasoru malu ho PM Hun Sen, maibé hetan mós premiu akademiku ida husi American University of Phnom Penh, no asiste mós seremonia abertura eventu desportiva ASEAN nian ka SEA GAMES ne’ebé atleta Timor-oan lubuk ida ho bandeira RDTL mós partisipa hotu iha eventu ne’e.
Xanana ho PM Hun Sen hasoru malu ona iha loron Sábadu 06 Maiu 2023 iha Phnom Penh hodi diskuti kona-ba kooperasaun bilateral entre nasaun rua nian iha área ekonomia, komersiu no edukasaun, arte-kultura, no adezaun Timor-Leste nian ba membru ASEAN.
Enkontru armónia ne’ebé hala’o iha Palasiu ba Dame Cambódia ne’e, Xanana hato’o agradese ba konvite espesiál nian hamutuk ho atleta Timoroan partisipa abertura SAE GAMES ne’ebé hala’o espetakuler tebes, tanba partisipa direita hosi atleta rihun hosi nasaun membru ASEAN tomak.
Xanana konsidera, selebrasaun Sea Games tinan ne’e la’o susesu tebes, no susesu ne’e konta ho povu Cambódia tomak nia apoiu, tanba Xanana rasik sente orgullu foin ba dala uluk mak nia partisipa hodi haree direita serimónia abertura ho atividade kultura oin-oin ne’ebé animadu tebes.
Xanana mós aproveita oportunidade osan-mean ne’e hodi hato’o povu Timor-Leste tomak nia agradesimentu ba Xefe Governu Cambódia, Samdach Hun Sen tanba ajuda makas tebes adezaun Timor-Leste atu sai membru ASEAN iha tempu besik no Cambódia ajuda mós povu Timor-Leste luta kontra peste COVID-19 iha tinan kotuk.
Xefe Governu Cambodia, Samdach Hun Sen bainhira hasoru Xanana hakuak-malu metin hodi hato’o agradese mós ba Xanana bele responde ninia konvite partisipa iha abertura SEA GAMES ne’ebé partisipa mós husi atleta Timoroan nain-93 resin.
Primeiru-Ministru Samdach Hun Sen promete sei apoia ekipa halo peskiza iha Timor-Leste hodi haree setór agrikultura nian, nune’e Cambódia bele apoia TL iha tempu besik hodi hasa’e produsaun ai-han iha rai laran.
Xanana oras ne’e maske nu’udar sidadaun baibain ida, la assume kargu ofisial ruma iha governasaun atual, maibé nia kontinua hetan fiar hosi Estadu Cambódia reprezenta povu, tane aas konvite PM Samdech Hun Sen hodi partisipa abertura SEA GAMES ba dala-XXXII.
Vizita Xanana ba hasoru PM Samdach akompaña direita hosi embaixadór Timor-Leste ba Cambódia, Hermenegildo Lopez “Kupa”, embaixador Roberto Soares, Konsilleira Embaixada Timor-Leste ba Reinu Cambódia, Josefina Tilman, Primeira Sekretaria Embaixada Timor-Leste ba Reinu Cambódia, Elisa Mesquita no ekipa protokolu no media mak Jimy Fernandes hosi TV GMN, no Eujevio Pereira (Ego Pereira) fotografu.
Prezidente Repúblika, José Ramos-Horta hasoru malu ho Liu-Rai Reiñu Kambódia, Narodom Sihamoni, hodi disktuti relasaun ekonómika no komersiál entre nasaun rua.
Xefe Estadu, Timor-Leste rezista avansu maka’as iha relasaun diplomátika, maibé presija aposta iha àrea komérsiu no ekonómiku.
Antes ne’e, Timor-Leste no Kambódia asina akordu kona-ba servisu aereo, hodi permite voo mensal husi Phnom Penh mai Díli, hodi fasilita passajeiru husi Xina mai Timor-Leste, tamba paíz ne’e jeográfikamente besik liu Xina.
