DILI (TOP) – Lider Karismátiku, Kay Rala Xanana Gusmão lori povu Timor-Leste tomak nia naran hato’o bem vindo no agradesimentu ba advogadu Bernard Collaery ne’ebé kontra maka’as hahalok governu Australia nian durante tinan barak kona-ba kazu espionajen ne’ebé hala’o husi ajensia sekreta Australia nian iha edifisiu Palásiu Governu Dili iha tinan 2004.
Bernard Collaery nu’udar advogadu id aba sasin save (Witnes K) ne’ebé oras ne’e kumpri hela pena prijaun iha Australia, tanba sobu sai segredu governu Australia nian hodi defende maka’as interese Timor-Leste nian kona-ba kazu lubuk inklui kazu espionajen nian.
Advogadu Collaery husu ba Timor-oan sira atu kontinua husu ba governu Australia hodi bele fó perdaun ba Witness K ne’ebé oras ne’e tama hela prijaun iha Australia.
Agradesimentu Xanana nian ba advogadu Collaery ne’e bainhira hasoru malu iha restaurante El Legendariu iha loron Sesta 19 Maiu 2023 oras tuku hitu dadersan, nain-rua hakuak malu-metin, no Xanana kahe hela tais ba nia kakorok nu’udar sinal fó bem vindo no agradesimentu ba advogadu ne’e ninia determinasaun hodi defende interese nasionál Timor-Leste nian kona-ba assuntu mina no gas ho Australia.
Advogadu Bernard Colaery hamutuk ho Steve Bracks, no Harold Mitchell sei simu kondekorasaun ho graú “Ordem de Timor-Leste” husi Estadu Timor-Leste ba sira nia dedikasaun, no komitmentu apoiu ba Timor-Leste nia luta ba soberania fronteira marítima ho Australia hanesan privelegiu boot ba povu Timor-Leste.
Steve Bracks, amigu di’ak Timor nian ne'ebé mós fó apóio maka’as ba Timor nia luta ba soberania fronteira marítima ho Australia, Steve mós agora asume hela kna'ar nudar Reprezentante Espesial Governu Australia ba Negosiasaun no Dezenvolvimentu Greater Sunrise, no Harold Mitchell nu’udar mós amigu di’ak povu Timor nian ne'ebé mós fó apóiu maka’as ba Timor-Leste nia luta ba soberania fronteira marítima ho Australia.
