DILI (TOP) – Deputadu bankada CNRT hamutuk nain 21 iha Parlamentu Nasionál desididu ona hodi hasoru malu eis Primeiru-Ministru atual Sekretariu Jeral Partidu FRETILIN, Mari Bim Amude Alkatiri iha Tribunal.
Iha loron Tersa 23 Juñu 2020, membru Komisariu Politika Nasionál husi partidu CNRT públika sai informasaun kona-ba alegasaun Oceanic Exploration nian hasoru Mari Alkatiri ne’ebé deskonfia komete subornu. Informasaun ne’e públika sai iha media nasionál sira iha rai-laran foin lalais. Iha públikasaun KPN CNRT ne’e katak Oceanic alega Alkatiri simu osan millaun $2.5 husi ConocoPhillips (COP) hodi fo lisensa Esplorasaun mina no gas iha Tasi Timor ba COP. Ho kestaun ne’e, iha fulan Juñu tinan 2008, Alkatiri halo ona keixa defamasaun hasoru Oceanic Exploration, no iha loron Tersa 7 Jullu 2020, Alkatiri halo ona mós keixa kontra membru KPN CNRT ne’ebé fó sai informasaun ne’e, tanba konsidera akuzasaun ne’e falsu.
Nia konsidera akuzasaun membru KPN CNRT ne’e laiha evidensia no defama nia onra, privasidade no seluk tan.
“Ha’u mai hanesan sidadaun para atu reklama ba Estadu ha’u nia direitu. Direitu bom nome (narak di’ak), direitu dignidade, direitu atu labele… nafatin katak akuzasaun ne’e laiha baze,” Alkatiri hateten ba jornalista sira iha edifisiu Prokuradoria Jeral Repúblika (PJR), Kolmera-Dili, Tersa 7 Jullu 2020.
Alkatiri hatutan, durante tinan 50 nia laran, nia sempre tolera hela de’it ema sira ne’ebé halo akuzasaun falsu hasoru nia.
“Agora komu ha’u haree buat sira ne’e atu sai fali boot ba bebeik, entaun ha’u hanoin to’o tempu ona atu hatudu ba maluk sira ne’e katak labele abuza demais ho ha’u nia toleransia. Labele abuza demais ho ha’u nia toleransia, tanba lei iha, tanba Estadu tenke funsiona, justisa tenke funsiona,” Alkatiri afirma.
Kona-ba akuzasaun ne’ebé lansa husi membru KPN CNRT ne’e iha duni evidensia ka la’e mak sira sei ba prova iha Ministériu Púliku iha fundamentu ka la’e.
“Se laiha fundamentu, sira tenke responsabiliza,” esplika Alkatiri.
Nia hatutan, keixa dahuluk ne’ebé nia hatama ne’e kontra membru KPN CNRT ne’ebé asina ba sira nia públikasaun iha loron 23 Juñu 2020. Membru hirak ne’e mak hanesan Virgilio Simith, Maria Rosa Camra “Bisoi”, Tomas do Rosario Cabral, Bendito dos Santos Freitas, Francisco da Costa “Ikulay”, Jacinto Rigoberto Gomes de Deus, Francisco da Costa Guterres, no Jacinto Viegas “Roque”.
Keixa tuir mai, tuir Alkatiri katak sei keixa tan bankada CNRT, keixa tuir mai sei kontra tan sidadaun nain 4, no liutan ida ne’e sei keixa tan media balun.
Entretantu, membru KPN CNRT sira oras ne’e prontu hela hodi hein notifikasaun husi Ministériu Públiku kona-ba keixa ne’ebé hatama ona husi Mari Bim Amude Alkatiri.
"Ami prontu hein hela, se karik lori ami ba Tribunál atu hasai ami hotu husi deputadu mós ami prontu. Deputadu CNRT na'in 21 ba hotu kedas mós di’ak hela,” xefe bankada CNRT Duarte Nunes hateten ba jornalista sira iha Parlamentu Nasionál, Dili Tersa 7 Jullu 2020.
