DILI (TOP) – Provedoria ba Direitu Humanus no Justisa (PDHJ) simu keixa hamutuk 246 iha tinan 2020, no durante fulan 6 iha tinan ida ne’e foin maka simu keixa hamutuk 76.
Provedora Provedoria Direitu Umanu no Justisa (PDHJ), Jesuína Maria Ferreira Gomes esplika, husi keixa 246 iha tinan 2020 liuba fahe ba keixa hamutuk 94 mai husi governasaun di’ak, no 152 mai husi violasaun direitu umanu.
Nia hatutan, kazu númeru violasaun direitu umanu iha tinan kotuk sa’e maka’as ho total keixa 152 kompara ho kazu husi governasaun di’ak ne’ebé nia númeru keixa ne’e hamutuk de’it 94, no keixa kona-ba kazu violasaun direitu umanu husi fulan Janeiru to’o fulan Juñu tinan ida ne’e mós maka’as ona hamutuk 42 kompara ho kazu governasaun di’ak foin maka to’o 34.
“Relatóriu ne’e iha kapítlu hitu (7) iha área importante hat (4). Ida, kona-ba formasaun no treinamentu iha área direitu umanu no boa governasaun, segundu kona-ba keixa no investigasaun iha área direitu umanu no boa governasaun, terseiru kona-ba fískalizasaun no rekomendasaun ba instituisaun estadu sira no ikus liu kona-ba jestaun institusionál,” hateten Provedora Jusuina ba jornalista sira iha Parlamentu Nasionál, Kuarta 23 Juñu 2021.
“Ohin, ha’u ho adjunto sira mai hasoru prezidente parlamentu nasionál atu entrega ami nia relatóriu anúal ka atividade ne’ebé hala’o iha tinan 2020, tanba haktuir iha lei Nu. 7/2004 artigu 34 ho 46 katak ate 30 Juñu tinan-tinan PDHJ tenki mai entrega relatóriu ba iha parlamentu kona-ba atividade estatistika keixa kazu nian ne’ebé hala’o hosi Janeiru mai to’o iha Dezembru,” nia esplika.
Eis Komisaria Funsaun Púbika ne’e hatutan, PDHJ kumpri nia dever no mandatu hodi mai entrega relatóriu relasiona ho serbisu liuliu kona-ba kazu sira ne’ebé mak durante tinan ida nia laran fó asisténsia ba.
Alende pontu importante 4 ne’ebé sita iha leten hanesan kontiudu hosi relatóriu ne’ebé mai hato’o, biban ne’e mós iha rekomendasaun balun ne’ebé PDHJ hato’o ba PN no ba entidade governu sira nian.
Nia dehan Prezidente Parlamentu Nasionál sei buka tempu hodi konvida hikas PDHJ atu marka prezensa iha plenária Parlamentu Nasionál nune’e halo aprezentasaun nune’e bele esplika no hato’o atividade durante tinan ida nian ba distinto deputadu sira atu bele konsidera mós dezafiu no rekomendasaun ne’ebé PDHJ hato’o iha nia relatóriu.
