Julgamentu videoconference difikulta kazu Topu Honis

DILI (TOP) – Prosesu julgamentu via videoconference difikulta tebes arguidu eis padre RD, tanba arguido la rona mós. Nune’e, prosesu julgamentu sei kontinua fali iha oras tuku rua lorokraik.

Advogadu Miguel Faria katak, prosesu julgamentu labele realiza iha parte dadersan, tanba mosu fallansu tekniku, no mós nia kliente eis padre RD la rona mós kona-ba pergunta sira tantu husi juiz no prokurador sira iha video conference ne’e.

“Orsida lorokraik maka kontinua fali. Ha’u nia klinte la rona moos ida,” hateten advogadu Miguel Faria ba jornalista sira iha edifisiu Tribunal Rekursu iha Kaikoli, Dili Kuarta 09 Juñu 2021.

“Teleconference ne’e ladun di’ak, tanba ha’u nia kliente ladun rona moos, ao mesmo tempo defeza mós hasoru situasaun ida foin primeira vez. Liu husi teleconference ne’e buat foun ida ba ha’u, no ha’u hanoin ida ne’e ladun favorel. Estratejia defenza nian menus itoan hodi hasoru situasaun ida ne’e,” advogadu Faria afirma.

Rajaun halo prosesu julgamentu liu husi teleconference tanba tuir advogadu Miguel Faria katak, antes ne’e iha loron 24 Maiu liuba, parte advogadu halo ona pedidu ba Sentru Integradu ba Jestaun Krize (SIJK), maibé bainhira hato’o ba Rejiaun Administrative Espesial Oe-Kusi Ambeno (RAEOA) sira la aseita ida. No iha loron 01 Maiu liuba, nia ba to’o Oe-Kusi Ambeno ho ro maibé, autoridade RAEOA rejeita nia atu tun iha ne’eba ho rajaun lakohi advogadu ne’e atu halo auto-kuarentena iha Oe-Kusi Ambeno.

Arguidu RD hamutuk ho nia advogadu Miguel Faria iha salaun julgamentu iha Tribunal Rekursu iha Kaikoli, Dili Kuarta 09 Juñu 2021. Foto TOP/Raimundos Oki

“Ne’ebé ha’u loron 3 iha Oe-Kusi Ambeno depois fila-fali de’it”.

Nia hatutan, prosesu julgamentu iha periodu serka sanitaria ne’e prejudika tebes administrasaun judisiariu nian.

“Tanba entre desijaun serka sanitaria husi nivel sentral ho rejional la hanesan ida. Dalaruma desijaun Konsellu Ministru nian tuir defeza nia intendimentu ne’e katak iha rua. Oe-Kusi Ambeno nian buat ketak ida, Dili nian buat seluk ida. Ha’u hanoin ida ne’e defeza hare katak ne’e … defeza la duun maibé, defeza deskonfia iha buat balun la dun di'ak,” nia esplika.

Advogadu Miguel Faria mós rejeita komentariu sira husi parte balun ne’ebé akuza sira katak, defeza ho arguidu durante ne’e la kolabora ho justisa.

“Maibé, realidade defeza nia komportamentu hatudu boa fe atu kolabora ba prosesu ne’e la’o ba lalais, maibé serka sanitaria, konfinamentu obrigatoriu prejudika tebes atividade hotu,” advogadu Faria esplika hodi rejeita akuzasaun husi públiku.

Kona-ba kazu eis padre RD ne’e parte Vatikanu hasai ona desijaun suspensaun ba nia, no arguido ne’e mós hetan akuzasaun kriminal husi labarik nain 15 kona-ba violasaun sexual no violensia domestika.

Entretantu, prosesu julgamentu ne’ebé hala’o iha Tribunal Oe-Kusi iha loron Segunda 07 Juñu 2021, Pradet kontinua obriga tan labarik feto nain 5 atu ba toba uma mahon ne’ebé prepara husi Pradet, maibé labarik sira lakohi, tanba trauma ho lalaok serbisu Pradet Ambeno nian durante ne’e kona-ba hala’o visum obrigatoriu ba labarik feto nain 30 husi uma mahon Topu Honis iha Oe-Kusi Ambeno iha tinan 2020.

Notisia relevante: Hafoin julgamentu Pradet Ambeno kontinua obriga labarik Topu-Honis

Tuir dadus balun ne’ebé TOP asesu katak, kuaje labarik feto nain 30 maka sai vitima ba visum obrigatoriu ne’ebé hala’o husi Pradet iha Oe-Kusi Ambeno iha tinan 2020.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter