DILI (TOP) – Enkontru entre Membru Komité Ezekutivu (Exco) husi Federasaun Futebol Timor-Leste ne’ebé la’o kuaje oras lima (5) nia laran husi tuku 4 lorokraik to’o 8 kalan, konsege foti ona desijaun hodi suspende Xefe Gabinete Prezidente FFTL, Melania da Silva Fernandes Capela ho durasaun tempu indeterminadu.
Maske nune’e, tuir informasaun balun ne’ebé TOP asesu husi membru Exco balun katak, rezultadu husi enkontru Exco ne’e foti ona desijaun hodi fó suspensaun ho durasaun tempu indeterminadu ba Xefe Gabinete Prezidente FFTL, Melania da Silva S. Capela.
KORESAUN:
Redasaun The Oe-Kusi Post (TOP) halo koresaun ba naran Xefe Gabinete FFTL, Melania da Silva S. Capela ne’e laloos. Naran loloos maka Melania da Silva Fernandes Capela.
Ba fallansu ne’e redasaun TOP hadia tiha ona, no husu deskulpa ba públiku.
“Ami ohin desidi ona katak, fó suspensaun ba Xefe Gabinete Prezidente FFTL ho nia durasaun tempu indeterminadu. Desijaun ne’e fó poder ba Sekretariu Jeral FFTL maka sei fó sai ba públiku iha tempu badak,” esplika membru Exco ida ne’ebé husu ba TOP atu labele públika nia identidade pessoal iha notisia ne’e iha edifisu FFTL, Tersa, 16 Novembru 2021.
Membru Exco ne’e esplika, saida maka Prezidente FFTL hato’o ba jornalista sira ne’e nia la honestu ida kona-ba desijaun Exco nian, tanba desijaun Exco ne’e klaru ona katak desidi suspensaun ba Xefe Gabinete Prezidente FFTL, Melania da Silva Fernandes Capela ne’e.
Iha fatin hanesan, Prezidente FFTL, Francisco Martins da Costa Pereira Jerónimo katak, rezultadu husi enkontru entre membru Exco sira ne’e hanesan baibain kona-ba administrasaun ninian inklui serbisu sira ne’ebé maka FFTL hala’o no desijaun sira ne’ebé foti ho unanimu katak, la’o di’ak hotu no familia bola labele saida … no saida maka akontese iha resintu FFTL foin lalais, tuir governante ne’ebé mai husi partidu FRETILIN ne’e katak, laiha problema ida.
“No, ami laiha espulsa. Laiha espulsa tanba saida? … hanesan ohin ha’u dehan katak hanesan familia, familia bola, iha problema tuur hamutuk fó solusaun. Solusaun ohin loos ona, hotu-hotu simu hanesan maun-alin, hanesan familia bola,” hateten Prezidente FFTL, Francisco Martins da Costa Pereira Jerónimo.
Informasaun balun ne’ebé TOP asesu katak, Melania da Silva Fernandes Capela antes ne’e serbisu nu’udar resepsionista ba Presidente FFTL, maibé ikus mai nakfilak ba Xefe Gabinete Prezidente FFTL nian to’o hetan ona suspensaun husi rezultadu enkontru Exco nian iha loron Tersa, 16 Novembru 2021.
Membru Exco ne’e hatutan, rajaun fundamental ne’ebé lori sira foti desijaun hodi suspensa Melania husi nia kargu nu’udar Xefe Gabinete Prezidente FFTL ne’e, tanba relasiona ho problema ne’ebé akontese iha loron Domingu, 08 Novembru 2021, purvolta tuku 06:00 dadersan Otl, ne’ebé Prezidente FFTL nia família, kompostu husi nia espoza, oan-feto no mane, inklui nia-alin rasik nia ferik-oan halo barullu iha resintu FFTL nian hodi rezulta harahun kareta Nissan ida.
Iha akontesimentu ne’e, família hosi ezekutivu FFTL nian ne’e hamriik, baku no rakut, funsionária FFTL ne’e no baku-rahun karreta marka Nisan ne’ebé funsionária FFTL ne’e nian tanba família deskonfia karreta ne’e rezultadu hosi amante maka pesoál ezekutivu FFTL ne’e sosa ba funsionária ne’e.
Kazu ne’e mosu iha resintu FFTL, la’os iha Comitte Central FRETILIN (CCF). Maibé, Prezidente FFTL, Francisco Martins da Costa Pereira Jerónimo la’os rezignaa husi nia kargu nu’udar Prezidente FFTL, maibé desidi rezigna aan fali husi CCF. Situasaun ne’e kontrariu tebes. Katar iha ulun, koir fali iha ain.
Tanba konsidera kazu ne’e soke nia reputasaun, no nia privasidade, Francisco Jerónimo katak ona sei lori kazu ne’e ba Tribunál atu bele hetan lia-loos no justisa.
Governante mai husi partidu FRETILIN ne’e katak, nia parte halo ona klarifikasaun liuhusi konferénsia imprensa kona-ba insidente iha resintu FFTL ne’e iha Sede Comite Central FRETILIN (CCF) no rejeita total informasaun ne’ebé espalla iha públiku, katak insidente ne’e iha relasaun ho deskonfia subar amante iha Xanana Sport Centre.
Fransisco Jerónimo, klarifika katak nia iha direitu tomak atu uza FFTL tanba hanesan lideransa másimu iha FFTL.
“Prezidente FFTL uluk, Francisco Kalbuadi Lay, bele uza nusa ha’u labele. Pergunta mak ne’e,” nia hateten ba jornalista sira bainhira halo enserramentu ba Kongresu Estra-ordináriu organizasaun jornalista Timor Leste Press Union (TLPU) iha Salaun Delta Nova, Dili, Sábadu, 13 Novembru 2021.
Estatutu FFTL nian iha artigu 38 katak, membru ezekutivu sira maioria (porsentu 50 husi total membru) bele halo pedidu reuniaun atu bele buka solusaun ba kualkér situasaun iha FFTL. No reuniaun ne’e hala’o ona iha loron Tersa, 16 Novembru 2021 ne’ebé la’o kuaje oras lima nia laran ho nia rezultadu maka foti desijaun suspende Xefe Gabinete Prezidente FFTL, Melania da Silva Fernandes Capela.
KORESAUN:
Redasaun The Oe-Kusi Post (TOP) halo koresaun ba naran Xefe Gabinete FFTL, Melania da Silva S. Capela ne’e laloos. Naran loloos maka Melania da Silva Fernandes Capela.
Ba fallansu ne’e redasaun TOP hadia tiha ona, no husu deskulpa ba públiku.
