DILI (TOP) – Prezidente Federasaun Futebol Timor-Leste atual Ministru ba Assuntu Parlamentar no Komunikasaun Sosial (MAPKOMS), Francisco Martins da Costa Pereira Jerónimo “la honestu” ba desijaun ne’ebé hasai husi rezultadu enkontru entre Membru Komité Ezekutivu (Exco).
The Oe-Kusi Post (TOP) observa enkontru entre membru Exco sira ne’e hala’o iha edifisiu FFTL iha loron Tersa, 16 Novembru 2021 iha oras tuku 4 lorokraik to’o remata iha oras tuku 8 kalan.
KORESAUN:
Redasaun The Oe-Kusi Post (TOP) halo koresaun ba naran Xefe Gabinete FFTL, Melania da Silva S. Capela ne’e laloos. Naran loloos maka Melania da Silva Fernandes Capela.
Ba fallansu ne’e redasaun TOP hadia tiha ona, no husu deskulpa ba públiku.
Partisipa iha enkontru ne’e maka membru Exco sira hanesan Superintendente Xefe, Henrique da Costa, Maria Terezinha Viegas, Vise Xefe Estadu Maior Jenerál Falintil-Forsa Defeza Timor-Leste (F-FDTL), Major Jenerál Falur Rate Laek, Vise Prezidente FFTL, Aleixo Cobra inklui Sekretariu Jeral FFTL, Nelyo Isaac Sarmento.
Hafoin hasai lia-fuan ne'e jornalista TOP kamera leno ba nia hodi husu esplikasaun, maibé nia la'o tama dadauk ona ba nia serbisu fatin, no la'o tama ba seidauk to'o segundu ida, Prezidente FFTL mós la'o sai mai hodi husu kona-ba saida maka akontese. Nune'e, jornalista sira la'o hakat sa'e ba andar leten hodi halo intervista kona-ba rezultadu enkontru membru Exco sira.
Prezidente FFTL, Francisco Martins da Costa Pereira Jerónimo katak, rezultadu husi enkontru entre membru Exco sira ne’e hanesan baibain kona-ba administrasaun ninian inklui serbisu sira ne’ebé maka FFTL hala’o no desijaun sira ne’ebé foti ho unanimu katak, la’o di’ak hotu no familia bola labele saida … no saida maka akontese iha resintu FFTL foin lalais, tuir governante ne’ebé mai husi partidu FRETILIN ne’e katak, laiha problema ida.
“No, ami laiha espulsa. Laiha espulsa tanba saida? … hanesan ohin ha’u dehan katak hanesan familia, familia bola, iha problema tuur hamutuk fó solusaun. Solusaun ohin loos ona, hotu-hotu simu hanesan maun-alin, hanesan familia bola,” hateten Prezidente FFTL, Francisco Martins da Costa Pereira Jerónimo ba jornalista sira iha edifisiu FFTL, Tersa, 16 Novembru 2021.
Antes ne’e media online Hatutan.com fó sai katak, iha Domingu 08 Novembru 2021, purvolta tuku 06:00 dadersan Otl, ezekutivu FFTL ne’e nia família, kompostu husi nia espoza, oan-feto no mane, inklui nia-alin rasik nia ferik-oan, kaer-toman pesoál ezekutivu FFTL ne’e ho nia amante iha resintu FFTL nian.
Iha akontesimentu ne’e, família husi ezekutivu FFTL ne’e hamriik, baku no rakut, funsionária FFTL ne’e no baku-rahun karreta marka Nisan ne’ebé funsionária FFTL ne’e nian tanba família deskonfia karreta ne’e rezultadu hosi amante maka pesoál ezekutivu FFTL ne’e sosa ba funsionária ne’e.
Família sira la simu no halo barullu iha resintu FFTL. Tanba durante ne’e pesoál ezekutivu FFTL ne’e la tama uma no dezde kedas hahú Covid-19, pesoál ezekutivu FFTL ne’e uza dormitóriu Xanana Sport Centre hodi sai hela fatin ho nia amante ne’ebé nu’udar mós funsionária FFTL nian.
Maske nune’e, governante FRETILIN mai husi munisipiu Likisa ne’e katak, saida maka akontese iha resintu FFTL ne’e lalori impaktu negativu ba reputasaun FFTL.
“Laiha, neim itoan mós laiha,” afirma Francisco Jerónimo.
Maske nune’e, tuir informasaun balun ne’ebé TOP asesu husi membru Exco balun katak, rezultadu husi enkontru Exco ne’e foti ona desijaun hodi fó suspensaun ho durasaun tempu indeterminadu ba Xefe Gabinete Prezidente FFTL, Melania da Silva Fernandes Capela.
“Ami ohin desidi ona katak, fó suspensaun ba Xefe Gabinete Prezidente FFTL ho nia durasaun tempu indeterminadu. Desijaun ne’e fó poder ba Sekretariu Jeral FFTL maka sei fó sai ba públiku iha tempu badak,” esplika membru Exco ida ne’ebé husu ba TOP atu labele públika nia identidade pessoal iha notisia ne’e.
KORESAUN:
Redasaun The Oe-Kusi Post (TOP) halo koresaun ba naran Xefe Gabinete FFTL, Melania da Silva S. Capela ne’e laloos. Naran loloos maka Melania da Silva Fernandes Capela.
Ba fallansu ne’e redasaun TOP hadia tiha ona, no husu deskulpa ba públiku.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
