Governu Tenke Kontrola GAM

Oekusipost.com Dili – Governu reativa ona rezolusaun Governu ho númeru 16/2013 10 Jullu kona-bá bandu atividade Grupu Arte-Marsiál (GAM) iha teritóriu nasionál, maibé nain ba asaun penal, Ministériu Públiku husu ba governu atu kontrola nafatin ho másimu.

Prokurador Jeral Repúblika, José da Costa Ximenes katak relatóriu Ministériu Públiku nian hatudu konflitu barak ne’ebé mosu no akontese iha sosiedade nia le’et iha rai laran, tanba kauza barak liu husi atividade GAM ne’e.

"Sekretáriu Estadu Juventude no Desportu tenke kontrola didi'ak tanba GAM hamosu konflitu barak iha sosiedade. La'ós ema hotu iha ne'eba ne'e mesak aat de'it, maibé, ataka malu bebeik ne'e mai husi ne'eba", hatete Prokurador Jeral, José Ximenes ba jornalista sira iha Palásiu Prezidensial iha Ai-Tarak Laran, Dili Segunda 9 Marsu 2020.

Antes ne'e, Governu liuhusi reuniaun Konsellu Ministru (KM) iha 18 Fevereiru, aprova Proposta Rezolusaun Governu ne’ebé aprezenta husi Primeiru-Ministru (PM), Taur Matan Ruak, ba revogasaun Rezolusaun Governu númeru 16/2013 10 Jullu, ne’ebé bandu GAM hala’o atividade. Diploma legál ne'e rasik, instrui Polísia Nasionál Timor-Leste (PNTL) atu intensifika asaun.

Antes ne'e mós Komandante Jerál PNTL, Komissáriu Faustino da Costa apela ba kulakér GAM, bainhira hakarak hala'o atividade, tenke respeita leí númeru 5/2017 19 Abril. (*)

PUBLISIDADE