Melania hetan ona suspensaun fulan 3

DILI (TOP) - Sekretariu Jerál Federasaun Futebol Timor-Leste (FFTL), Nelio Isaac Sarmento ezekuta ona desijaun husi rezultadu membru Exco nian hodi fó suspensaun durante fulan tolu (3) ba Xefe Gabinete FFTL, Melania da Silva Fernandes Capela.

"Desijaun ne'e la'os ba kazu asaltu iha FFTL, maibé suspensaun ne'e bazeia ba nia mal-edukasaun ba nia hirarkia ne'ebé akontese iha loron 04 Outubru 2021," katak Nelio Isaac Sarmento via kontaktu telemovel ba The Oe-Kusi Post (TOP) Kinta, 18 Novembru 2021.

KORESAUN:

Redasaun The Oe-Kusi Post (TOP) halo koresaun ba naran Xefe Gabinete FFTL, Melania da Silva S. Capela ne’e laloos. Naran loloos maka Melania da Silva Fernandes Capela.

Ba fallansu ne’e redasaun TOP hadia tiha ona, no husu deskulpa ba públiku.

Eis Sekretariu Estadu Komunikasaun Sosial ne'e hatutan, kona-ba kazu asaltu iha FFTL ne'ebé harahun Melania nia kareta Nissan ne'e sei desidi husi membru Exco sira.

Nia hatutan, desijaun suspensaun ne'e fó tiha ona iha loron Kinta, 18 Novembru 2021. Durasaun ba suspensaun ne'e sei hahu husi loron 22 Novembru 2021 to'o loron 22 Fevereiru 2022.

"Suspensaun ne’e la’os tanba kazu asaltu iha kantor FFTL nian ne'e, maibé tanba kauza husi insultu ba ninia hirarkia nu'udar Sekjen ne'ebé akontese iha 4 de Outubro 2021," Nelio afirma.

Antes ne’e, iha loron Tersa, 16 Novembru 2021 akontese enkontru entre Membru Komité Ezekutivu (Exco) FFTL ne’ebé la’o kuaje oras lima (5) nia laran husi tuku 4 lorokraik to’o 8 kalan, konsege foti desijaun hodi suspende Xefe Gabinete Prezidente FFTL, Melania da Silva Fernandes Capela ho durasaun tempu indeterminadu.

“Maibé, Sekjen tetu ho hanoin hotu hodi fó suspensaun fulan 3,” Nelio esplika.

Tuir dadus insultu husi Melania da Silva Fernandes Capela ba Sekretariu Jeral FFTL, Nelio Isaac Sarmento ne'ebé TOP iha hatudu, Melania hasai duni lia-fuan insultu, no mal-trata ba Nelio Isaac nu'udar ema importante ida mós iha estrutura FFTL nian.

Notisia relevante: Membru Exco desidi suspende Xefe Gabinete Prezidente FFTL

Kona-ba kestaun ne’e, antes ne’e Prezidente FFTL, Francisco Martins da Costa Pereira Jerónimo katak, rezultadu husi enkontru entre membru Exco sira ne’e hanesan baibain de’it kona-ba administrasaun ninian inklui serbisu sira ne’ebé maka FFTL hala’o no desijaun sira ne’ebé foti ho unanimu katak, la’o di’ak hotu no familia bola labele saida … no saida maka akontese iha resintu FFTL foin lalais, tuir governante ne’ebé mai husi partidu FRETILIN ne’e katak, laiha problema ida.

“No, ami laiha espulsa. Laiha espulsa tanba saida? … hanesan ohin ha’u dehan katak hanesan familia, familia bola, iha problema tuur hamutuk fó solusaun. Solusaun ohin loos ona, hotu-hotu simu hanesan maun-alin, hanesan familia bola,” hateten Prezidente FFTL, Francisco Martins da Costa Pereira Jerónimo.

Notisia relevante: Prezidente FFTL “la honestu” ba desijaun Exco

Informasaun balun ne’ebé TOP asesu, Melania da Silva Fernandes Capela antes ne’e serbisu nu’udar resepsionista ba Presidente FFTL, maibé ikus mai nakfilak ba Xefe Gabinete Prezidente FFTL nian to’o hetan ona suspensaun husi rezultadu enkontru Exco nian iha loron Tersa, 16 Novembru 2021 ho durasaun tempu indeterminadu, maibé ikus mai Sekretariu Jeral FFTL, Nelio Isaac Sarmento tetu ba-mai hodi foti desijaun suspende Melania ba tempu fulan 3 nia laran.

Nelio esplika, kona-ba kazu asaltu malu entre família husi Prezidente FFTL ho Xefe Gabinete Prezidente FFTL ne’ebé akontese iha resintu FFTL iha loron Domingu, 07 Novembru 2021 iha horas tuku 6 dadersan seidauk hetan desijaun husi membru Exco sira.

“Ida ne’e kompetensia membru Exco sira atu bainhira maka sira foti desijaun ba kazu asaltu malu ne’e. Kazu asaltu malu ne’e la’os ha’u nia kompetensia. Desijaun ohin ne’e kona-ba ninia insultu ba ha’u,” Nelio esplika.

Públiku akompaña ho di’ak katak, kazu asaltu malu ne’e akontese duni iha área FFTL nian, la’os iha Comitte Central FRETILIN (CCF). Maibé, Prezidente FFTL, Francisco Martins da Costa Pereira Jerónimo la’os rezignaa husi nia kargu nu’udar Prezidente FFTL, maibé desidi rezigna aan fali husi CCF. Situasaun ne’e kontrariu tebes. Katar iha ulun, koir fali iha ain.

Tanba konsidera kazu ne’e soke nia reputasaun, no nia privasidade, Francisco Jerónimo katak ona sei lori kazu ne’e ba Tribunál atu bele hetan lia-loos no justisa.

Governante mai husi partidu FRETILIN ne’e katak, nia parte halo ona klarifikasaun liuhusi konferénsia imprensa kona-ba insidente iha resintu FFTL ne’e iha Sede Comite Central FRETILIN (CCF) no rejeita total informasaun ne’ebé espalla iha públiku, katak insidente ne’e iha relasaun ho deskonfia subar amante iha Xanana Sport Centre.

Fransisco Jerónimo, klarifika katak nia iha direitu tomak atu uza FFTL tanba hanesan lideransa másimu iha FFTL.

“Prezidente FFTL uluk, Francisco Kalbuadi Lay,   bele uza nusa ha’u labele. Pergunta mak ne’e,” nia hateten ba jornalista sira bainhira halo enserramentu ba Kongresu Estra-ordináriu organizasaun jornalista Timor Leste Press Union (TLPU) iha Salaun Delta Nova, Dili, Sábadu, 13 Novembru 2021.

The Oe-Kusi Post (TOP) esforsu ona kontaktu Melania da Silva Fernandes via nia número telemovél TELKOMCEL, maibé nia númeru la ativu. 

KORESAUN:

Redasaun The Oe-Kusi Post (TOP) halo koresaun ba naran Xefe Gabinete FFTL, Melania da Silva S. Capela ne’e laloos. Naran loloos maka Melania da Silva Fernandes Capela.

Ba fallansu ne’e redasaun TOP hadia tiha ona, no husu deskulpa ba públiku.

Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

Xefe Redasaun & Editor

• Governu sei reativa Border Pass entre Timor-Leste ho Indonézia Sexta, 14 Jullu 2023 01:25
• Timor-Leste simu ona konvite  ba Asembleia Uniaun Inter-Parlamentár iha Luanda Sexta, 14 Jullu 2023 00:28
• Reuniaun Konsellu Ministru aprova ona programa governu dasia Quarta, 12 Jullu 2023 17:00
• Bankada CNRT ezije investiga rekrutamentu APS iha Ambeno Terça, 11 Jullu 2023 07:36
• PLP prontu apoia governu dasia Sexta, 30 Juñu 2023 12:24