Governu fó han sidadaun kuarentena ho manu-tolun dodok

DILI (TOP) – Sidadaun kuarentena sira ne’ebé oras ne’e kumpri hela medida prevensaun moras Covid-19 iha kuarentena Hotel Vilaverde lamenta tebes ho hahan ne’ebé fó husi governu liliu empreza ne’ebé responsavel ba hahan ne’e la saudavel.

Tuir informasaun balun ne’ebé The Oe-Kusi Post (TOP) asesu, sidadaun kuarente sira iha kuarentena Hotel Vilaverde Dili lamenta tebes ho hahan ne’ebé sira simu iha loron Domingu, 10 Janeiru 2021, tanba manu-tolun da’an la saudavel ba sira atu konsumu. Nune’e sira so’e de’it.

“Ne’e ami sira iha kuarentena Vilaverde maka ne’e, matabisu dadaersan nian maka ne’e, manu-tolun a’at hanesan ne’e, kasian. Sira nia hakarak ne’e ami tenke moras duni hodi lalaika sai lalais ,” sidadaun kuarentena ida iha hotel Vilaverde lamenta.





Inisiu ema hamutuk nain 14 maka koloka ba hela iha kuarentena hotel Vilaverde, no hetan ona teste PCR husi ekipa Covid-19 Timor-Leste iha loron 30 Dezembru 2020. Rezultadu teste ne’e mós fó sai tiha ona iha loron 2 Janeiru 2021 ne’ebé hatudu iha sidadaun nain-rua maka pozitivu Covid-19 no evakua kedas ba sala izolamentu, no tuir fali iha loron 3 Janeiru 2021 nain ida tan pozitivu no evakuas kedas mós ba sala izolamentu.

Oras ne’e sei iha ema nain 11 maka sei hela iha kuarentena hotel Vilaverde, Dili no teste daruak nian mós hala’o tiha ona iha loron 10 Janeiru 2021. Rezultadu teste daruak nian sei fó sai iha tempu badak.

“Maibé, ami tenke hela tan loron 9 iha ne’e maka foin bele sai. Bainhira rejultadu teste ne’e maka negativu maka foin bele sai husi kuarentena iha loron 16 ka 17 Janeiru 2021,” esplika sidadaun kuarentena ida husi kuarentena hotel Vilaverde ba TOP foin lalais.

Entretantu, informasaun ikus ne'ebé TOP asesu, sidadaun kuarentena hirak ne'e sai tiha ona husi kuarentena Hotel Vilaverde iha loron Tersa, 12 Janeiru 2021.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE