DILI (TOP) – Ministériu Saúde husu ona ba traballador profisional sira iha Hosputal Nasionál Guido Valadres (HNGV) tenke aprezenta sira nia karta forma ida hodi nune’e bele rezolve pagamentu osan liña oin (Front Line) ba sira ne’ebé karik seidauk hetan.
Iha loron Tersa 7 Jullu liuba, traballador hamutuk 989 iha HNGV hato’o sira nia lamentasaun kona-ba mekanizmu selu osan liña oin hamosu diferensia dadus loron serbisu nian, maibé Ministra Saúde, Odete Maria Freitas Belo husu ona ba traballador hirak ne’e atu hato’o sira nia karta forma ida hodi bele rezolve problema ne’e.
Notisia relevante: Funsionariu HNGV ameasa greve hasoru MS ba subsidiu Front Line
"Ameasa ne'e, ha’u hanoin ita nia konstituisaun RDTL rasik iha artigu 41-42 fó liberdade ba sidadaun sira hotu atu halo protesta, maibe mak ne’e labele impede serbisu ospital nian, sentru saúde nian, no postu saúde nian," hateten Ministra Odete ba jornalista sira iha Palásiu Governu, Dili Kuarta 8 Jullu 2020.
Nia hatutan, funsionáriu HNGV iha direitu atu protesta hanesan traballador bai-bain sira iha direitu atu hato'o espresaun.
"Agora dalan ne'ebé sira halo liuhosi konferénsia ba imprensa ne'e normal ba ami Ministériu saúde mak ne’e importante tenke iha karta formal ruma mai hatete katak sira lakon loron balun hanesan loron ida ka rua laiha pagamentu, tanba lista ne’ebé mak Ministériu Saúde simu ne’e mai husi sira nia diretor sira," nia esplika.
Nune’e, Ministra husu tenke iha halo karta para justifika lori ba sira nia diretór asina lori mai para halo pagamentu.
"Tanba ne’e, mak ita dehan ita Protesta nee tenke iha karta formal ruma, ita servisu hanesan Traballadór Profesionál Funsaun Públika nia komunikasaun sira ne'e tenke liu husi formal, maibé sei ita uja media sosial hanesan WhatsApp, facebook mak ita Kontra agora ita atu halo nusa hanesan superior ita labele hatan iha facebook ka WhatsApp nee la'os nia dalan," Odete esplika.
