Funsionariu HNGV ameasa greve hasoru MS ba subsidiu Front Line

Funsionáriu HNGV kuaje hamutuk nain 989 mak halo ameasa greve hasoru Ministériu Saúde. Foto The Oe-Kusi Post/Marcelino Bata.

DILI (TOP) - Funsionariu sira ne’ebé hala’o knaar iha Hospital Nasionál Guido Valadares (HNGV), husu Ministériu Saúde (MS) atu halo klarifikasaun kona-ba subsidiu front line nian ba Coronavirus Disease 2019 (Covid-19).

Funsionáriu HNGV kuaje hamutuk nain 989 mak halo ameasa greve hasoru Ministériu Saúde.

Portavoz HNGV, Mario da Graça hateten, relasiona ho existensia diferensia dadus loron serbisu nian ba prestasaun saúde durente periodu estadu emerjensia ba iha moras Covid-19 entre jestór sira iha administrasaun sira ho professional sira ne’ebé kategoriza ba iha grupu rua hanesan, oras esensial ba professional saúde iha HNGV selu de’it ba loron 38 no oras non esensial ba jestór administrasaun HNGV no Ministériu Saúde masimu loron 65 no minimu loron 44.

“Haree husi dadus iha leten, mosu deskontentamentu iha ami nia leet, tanba iha implikasaun ba prosesu pagamentu durente estadu emerjensia,” hateten Mario liu husi konferénsia ba imprensa iha HNGV, Bidau-Dili, Tersa 7 Jullu 2020.

Nia esplika, iha semana kotuk professional saúde iha Hospital Naionál Guido Valadares, reprezente husi Xefe unidade ba kada departamentu hato’o ona pedidu klarifikasaun ba diresaun ezekutivu HNGV nian.

“Sira promete mai ami nia reprezentante katak, sira mak sei halo karta hodi husu klarifikasaun ba Ministériu Saúde, maibe ate agora sira laiha feed back husi parte kompetente to’o pagamentu ne’e tun ba loron 38,” Mario afirma.

“Esplika iha konfirma lalais mai ami kona-ba diferensia dadus sira iha leten no bazeia ba saida mak diferensia ne’e mosu, no klarifika mai ami pakote suplementu remuneratoriu ba loron 60 ne’ebe deside husi Estadu Timor Leste”.

Portavoz ne’e esplika, mekanizmu ezekusaun ne’e oinsá mak mosu diferensia entre Ministériu Saúde, Ministériu Defeza, Polisia Nasionál Timor-Leste (PNTL) no Falintil Forsa Defeza Timor-Leste (F-FDTL).

“Se durante loron 3 mak ami lahetan resposta ka esplikasaun pertinente husi parte kompatente ba ami nia ajensia ida ne’e, ami sei rekore alternativu sira hanesan tuir mai ne’e,” Mario ameasa.

Nia dehan, rekore alternativu sira parte ida husu ba Ministériu Saúde no Funsaun Públika bele fó ami nia diresaun feriadu durante loron 22, tanba haree prosesu pagamentu ba suplementu remuneratoriu tuir koridór funsionalismu Publiku nian la’os ba situasaun espesial ka estadu emerjensia.

“Ami sei halo greve ka mogok kerja, se banhira la hetan resposta ne’ebé loos iha loron tolu nia laran hahu husi loron ohin ba oin,” hakotu nia. 

Entretantu, Ministériu Saúde seidauk iha komentáriu ruma ba kestaun ne’e.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE