DILI (TOP)- Reprezentante povu iha Uma Fukun Parlamentu Nasionál (PN) preokupa tebes ba kapasidade governu nian hodi ezekuta osan moras virus corona (Covid-19), tanba lista reklamasaun, pagamentu ba otél sira no ekipa liña-frente balun seidauk simu subsídiu to’o ohin loron maske Estadu emerjénsia ne’e tama ba dala lima ona.
Deputadu Bankada FRETILIN Joaquim dos Santos, husu governu esplika kompromisu sira ne’ebé promesa ona ba pesoál sira iha front line, subsídiu ba família sira no subsídiu ba estudante sira.
“Governu iha ona kompromisu ba ida-ne’e ka seidauk, saida mak impede. Sé la kumpri karik ninia impedimentu baze ne’e saida, ha’u atu hakarak hatene de’it idane’e”, deputadu Joaquim dos Santos levanta kestaun iha reuniaun Komisaun Permanente nian iha Parlamentu Nasionál-Dili, Kinta 3 Setembru 2020.
Entretantu, deputada bankada CNRT, Maria Fernanda Lay protesta governu kona-ba ezekusaun entre 17 abríl to’o 24 jullu 2020 ba Parlamentu Nasionál no Prezidente Parlamentu Nasionál hato’o ba komisaun 1 setembru 2020.
“Iha períodu 17 abríl ba 31 agostu foin iha 2 setembru, ne’e la justu. La fó tempu ba deputadu sira atu lé dokumentu ne’e. iha dekretu-lei kona-ba fundu covid-19 hatete periodikamente governu tenke hato’o nia ezekusaun no saldo la’ós akumulativu. Parlamentu la’ós mákina ida hatama ba hodi fó analiza mai ita. Ami presiza hato’o pergunta balun ba membru governu kona-ba asuntu ne’e, liuiu rejista iha pájina 5 hosi relatóriu 17 abríl to’o 24 jullu. Iha-ne’ebá deteta iha diferensa ne’ebé ita iha segunda vez millaun $ 60 ita fó-fila $ 500 mill”, dehan Deputada Maria Fernanda Lay.
Membru Komisaun C ne’e husu Ministériu Finansa atu esplika kle’an ezekusaun ne’e molok Parlamentu Nasionál autoriza tán Estadu Emerjénsia dalima.
Deputada Maria Fernanda Lay husu governu esplika mós aluga karreta ne’ebé to’o agora seidauk halo pagamentu, governu la fasilita máskara ba komunidade, distansiamentu sosiál sai konfuzaun iha sosiedade, otél sira mós seidauk selu hotu no bee-moos atu fase-liman mós laiha.
“Tanba saida, pagamentu atarazadu, primeirra pagamentu ba benefisiáriu mós seidauk hotu, 100 dollar tuir programa governu nian mós ha’u la haree iha-ne’e, ne’e programa governu ne’ebé parlamentu simu”, dehan nia.
Portantu Deputadu Bankada KHUNTO, Luis Roberto, hateten kestaun estende ka lae ne’e la importante, importante mak kompromisu governu nian liuhosi fundu Covid-19 ne’e tenke ezekuta ho loloos.
“Ami ba baze rona lia tanba povu kbiit laek sira to’o agora seidauk hetan osan, la’ós estende estadu emerjénsia dalima ou lae maibé tenke responde situasaun povu ninian, balun hatama ona reklamasaun maibé até agora seidauk selu. Membru governu kompletu tiha ona, nusá mak ezekusaun fundu Covid-19 ne’e la la’o, problema iha-ne’ebé”, dehan nia.
Nune’e mós Deputada CNRT, Virgínia Ana Belo sekunda ideia hosi Deputadu Luis Roberto nian tanba membru governu kompletu maibé ezekusaun la la’o.
“Membru governu kompletu kapasidade mak inkompletu, troka ema tún-sa’e mak hanesan ne’e. Pagamentu ba otél ba sira mós seidauk hotu, pagamentu ba front line sira mós seidauk selu hotu, ida-ne’e mak kapasidade governu nian”, hateten deputada Bankada CNRT ne’e.
