CNRT Sai Ona Husi Governu Atual

Vise-Prezidente Partidu CNRT, Virgílio Smith (karuk), no Adjuntu Sekretáriu Jerál Partidu CNRT, Jacinto Rigoberto de Deus deklara pozisaun partidu CNRT sai ona husi governu atual liu husi konferénsia ba imprensa iha sede partidu CNRT iha bairro Grillos-Dili, Segunda 11 Maiu 2020. Foto The Oe-Kusi Post/Marcelino Bata.

Oekusipost.com Dili – Partidu Congresso Nacional da Reconstrução de Timor (CNRT) desidi sai ona husi estrutura governu atual hafoin mosu asaun politika husi partidu FRETILIN ne’ebé oras ne’e disponível ona hodi apoiu Primeiru-Ministru, Taur Matan Ruak atu kontinua lidera governu ne’e to’o tinan 2023 maske kondisaun ladun estável ona.

Hafoin CNRT hala’o análize kle’an ba dezenvolvimentu polítiku iha rai-laran deside fó mandatu ba Prezidente Partidu, Kay Rala Xanana Gusmão hodi haruka karta ba Primeiru-Ministru, Taur Matan Ruak, kona-ba rezolusaun tuir mai ne’e.

“Atu deklara publikamente katak CNRT nu’udar partidu retira-aan hosi governu atuál. Rekomenda ba hotu-hotu ne’ebé iha juñu 2018, partidu mak indijita hosi simu pose no hola-parte iha governu atuál atu rejigna-aan ho livre no vontade ”, Adjuntu Sekretáriu Jerál Partidu CNRT, Jacinto Rigoberto de Deus deklara assuntu ne’e liu husi konferénsia ba imprensa iha sede partidu CNRT iha bairro Grillos-Dili, Segunda 11 Maiu 2020.

Jacinto hatutan, Partidu CNRT hakarak fó sai ba públiku katak iha loron 30 fulan Abril, Komisaun Polítika Partidu CNRT realiza ninia reuniaun hodi buka tau hamutuk hanoin, atu responde ba situasaun ne’e. Iha loron 8 Maiu, sexta-feira kotuk, Komisaun Polítika Nasionál Partidu nian reúne, pela segunda vez, atu aborda asuntu ida ne’e duni no reafirma desizaun ne’ebé hasai tiha ona iha 30 Abríl.

Iha fatin hanesan, Vise-Prezidente Partidu CNRT, Virgílio Smith, haktuir akta reuniaun 30 Abril nian deside CNRT sai hosi Governu atuál.

“CNRT la halo parte ona iha VIII Governu. Hosi faktu ne’e, PLP ho KHUNTO de’it mak mantén hela iha Governu, partidu rua ne’e, PLP ho KHUNTO, iha de’it Deputadu Sanulu Resin Tolu, nebé la reprezenta maioria iha Parlamentu Nasionál,” nia afirma.

Nia hatutan, Partidu istóriku FRETILIN sei fó apoia, tanba haruka ona lista partidu-nian ba membrus Governo, tuir plataforma entendimentu ne’ebé asina ho PLP;

Nia esplika, Konstituisaun dehan, iha artigu 85º. katak ‘Prezidente Repúblika nomeia no fó pose ba Primeiru-Ministru, ne’ebé indijitadu hosi partidu ou hosi aliansa partidu ho maioria parlamentar’.

“Ne’e katak, Partidu FRETILIN tenke tama iha Koligasaun foun ho PLP no KHUNTO, tanba, CNRT sai tiha ona hosi VIII Governu. Purtantu PLP ho KHUNTO, ho de’it Deputadu 13, la reprezenta legalmente ‘maioria parlamentár’.

Plataforma entendimentu bele funsiona hanesan ‘governu de inkluzaun’, hanesan ida-ne’ebé CNRT halo iha 2015, maibé VI Governu rasik iha ninia ‘maioria parlamentar’, tanba bankada FRETILIN sai nafatin opozisaun iha VI Governu.

“Tanba ne’e, labele uza ‘plataforma entendimentu’ hanesan dalan ida atu FRETILIN tama iha Governu husi odamatan kotuk, tanba Governu agora ne’e, legál no konstitusionalmente, lakon tiha ona ‘maioria parlamentár’, tanba Partidu CNRT sai tiha ona. Maibé Governu foun ne’ebé mai ne’e la’ós ona VIII Governu, no konstitusionalmente tenki iha reprezentatividade legál iha Parlamentu Nasionál.

Nune’e, Partidu CNRT hein katak, iha tempu badak Partiduu Tolu kompostu hosi FRETILIN, PLP ho KHUNTO sei hala’o idak-idak nia Konferénsia Nasionál atu aprova tama iha Koligasaun foun ida, ho definisaun klara kona-ba Koligasaun ne’e nia ámbitu ho ninia finalidade. tuir artigu 9º Lei Partidu Polítiku.

Partidu CNRT atentu hela ba manobra polítika sira ne’e, tanba Prezidente Repúblika, iha 2017, la ezije ba VII Governu, ne’ebé nia fó posse, atu tuir rekizitu husi artigo 9.º Lei Partidu Polítiku no bele akontese fali agora.

“Hodi permite fila-fali atu FRETILIN tama iha Governu, sein presiza Konferénsia, nune’e mós PLP ho KHUNTO, ho razaun katak sira iha ona Governu laran. Maibé, Governu ne’ebé sei mosu, labele hanaran VIII Governu, tanba CNRT, ho 21 kadeira iha Maioria Parlamentar, sai tiha ona nune’e, Governo foun ne’e tenke mosu hosi Koligasaun foun ida, atu bele sai IX Governu,” nia esplika.

Entretantu, iha semana kotuk hafoin remata hasoru Prezidente Repúblika, Primeiru-Ministru, Taur Matan Ruak deklara, iha tempu badak Prezidente sei fó posse ba membro governu foun hamutuk nain 6, nain ida husi Partidu Demokrátiku (PD), no nain 5 husi partidu FRETILIN, maibé to’o oras ne’e seidauk akontese.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE