Oekusipost.com Dili – Partidu CNRT seidauk desidi nia pozisaun politika kona-bá intensaun no planu Primeiru-Ministru, Taur Matan Ruak atu remodela nia estrutura governu atual, maibé planeia ona hodi halo enkontru iha nivel Komisaun Politika Nasionál hodi hatan ba kestaun ne’e iha tempu badak.
Xanana mós hatene ona katak, Primeiru-Ministru Taur Matan Ruak desidi ona hodi bolu ema balun husi partidu FRETILIN atu kompleta nia estrutura governu atual ne’ebé desde tinan 2018 to’o oras ne’e mamuk hela, tanba Prezidente Repúblika, Francisco Guterres Lú Olo rejeita hodi fó posse ho rajaun ema sira ne’e iha hela problema ho justisa no sira nia profile la di’ak, mas Tribunal rasik deklara ona katak ema sira ne’e laiha kazu krime ruma ne’ebé rejista iha buletin kriminal.
“Tanba ohin ita konsentra iha ne’e, ami sei bolu Komisaun Politika Nasionál halo reuniaun hodi ko’alia kona-bá remodelasaun ne’ebé atu halo ba iha governu, CNRT nia pozisaun ne’e oinsa kona-bá membru CNRT sira iha governu laran,” Xanana hateten liu husi konferensia ba imprensa iha sede partidu CNRT iha bairo Grilos, Dili Kinta 30 Abril 2020.
Primeiru-Ministru, Taur Matan Ruak ko'alia hela ho jornalista sira iha Palásiu Prezidensial iha Ai-Tarak Laran, Dili Kinta 30 Abril 2020. Foto Oe-Kusi Post/Marcelino Bata.
Entretantu, Primeiru Ministru (PM), Taur Matan Ruak deside ona hodi kompleta nia estrutura governu liu husi involve membru partidu FRETILIN balun no PD viabiliza nia governasaun to’o tinan 2023.
"Governu hakarak kompleta ninia membru governu iha tempu badak,” hateten PM Taur ba jornalista sira iha Palásiu Prezidensial Dili Kinta ohin.
PM Taur esplika, nia sei la halo remodelasaun, maibé atu kompleta de’it estrutura governu ne’ebé kuaje tinan tolu ona nia ministru laiha.
"Atu halo kompleta de'it membru governu sira. Hanesan ita boot sira hatene, uluk governu toma pose na'in sia mak la hetan pose," PM Taur esplika.
Nia kontinua mantein membru governu sira ne’ebé mai husi partidu CNRT.
“Ha'u horseik ko'alia ho sira, katak polítika ne'ebé ami uza, hodi defende mak inkluzaun, entaun ha'u kontente serbisu ho sira durante tinan ida resin, no sira kontinua serbisu nafatin, maibé depende ba sira," nia esplika hodi hatutan, se membru governu sira husi CNRT mak hakarak rezigna a’an, entaun nia sei troka sira ho ema seluk.
“Bainhira membru governu husi partidu CNRT mak rejigna aan, ha'u sei prienxe ho seluk.”
Membru governus sira mai husi partidu CNRT ne’ebé oras ne’e iha hela governu atual hamutuk ema nain 9 ne’ebé kompostu husi ministru nain 3, no nain 6 seluk ne’e balun vise ministru no balun sekretariu estadu. Membru sira ne’e mak hanesan, Ministru Estadu Prezidénsia Konsellu Ministrus Hermenegildo Augusto Cabral Pereira, Ministru Negósius Estranjeirus no Kooperasaun Dionísio da Costa Babo Soares, Ministra Edukasaun, Juventude no Desportu Dulce de Jesus Soares, Vise-Ministra Finansas Sara Lobo Brites, Vise-Ministru Administrasaun Estatál Abílio José Caetano, Sekretáriu Estadu ba Kooperativa Sira Arsénio Pereira da Silva, Sekretáriu Estadu Juventude no Desportu Nélio Isaac Sarmento, Sekretáriu Estadu Arte no Kultura Teófilo Caldas, no Sekretáriu Estadu ba Asuntus Kombatentes Libertasaun Nasionál Gil da Costa Monteiro 'Oan Soru'".
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
