Oekusipost.com Dili – Prezidente partidu CNRT, Kay Rala Xanana Gusmão konsidera karta rezignasaun partidu KHUNTO kona-bá sai husi koaligasaun partidaria Aliansa Maioria Parlamentar (AMP) seidauk sufisiente, tanba integrasaun KHUNTO nian iha koaliagasaun ne’e liu husi desijaun kongresu extraordinariu partidu nian.
Xanana hatutan, karta ne’ebé KHUNTO hato’o ba nia iha loron Kuarta 29 Abril 2020 ne’e seidauk sufisiente.
“Ida ne’e seidauk sufisiente, tanba sira mai ne’e liu husi desijaun kongresu extraordinariu. Entaun, sira tenke halo kongresu extraordinariu mak desidi,” hateten Xanana liu husi konferensia ba imprensa iha sede partidu CNRT iha bairo Gillos, Dili Kinta 30 Abril 2020.
Xanana hatutan, “la hakfodak” no la hirus kona-bá partidu KHUNTO sai husi AMP ne’ebé nia lidera, tanba iha prosesu demokrásia ne’e nu’udar aktu normal ida, maibé karta ne’ebé haruka nia ne’e seidauk sufisiente, tanba tuir Xanana katak desijaun iha karta ne’e la’ós desidi liu husi ko ngresu extraordinariu.
"Ami la hirus KHUNTO, la iha buat ida, demokrásia. Partidu CNRT mak depois sei bolu Komisaun Politika Nasionál husi partidu ninian atu ko’alia kona-bá ida ne’e".
"Ami respeita sira, maibé atu fó lembra de’it ba sira katak ida ne’e la to’o. Se ita boot sira halo kongresu desidi mak tama, entaun tenke halo konferensia extraordinaria ida para dehan sai, se la’e orsida ita ka’er fali desijaun kongresu ne’e dehan ita ka’er malu hela ne’e."
Entretantu, partidu ki’ik 5 hamutuk ho partidu CNRT forma koaligasaun AMP iha loron Sábadu, 22 Fevereiru liuba ho objetivu atu forma governu foun bainhira desijaun Prezidente Repúblika, Francisco Guterres Lú Olo afavór ba koaligasaun ne’e, infelizmente to’o oras ne’e seidauk iha desijaun ruma maske Prezidente Repúblika mak husu rasik ba partidu politika sira halo movimentu politika hodi solusiona impase politika iha rai-laran.
Tuir karta rezignasaun Partidu Kmanek Haburas Unidade Nacional Timor Oan (P.KHUNTO) ne’ebé asina husi prezidente partidu KHUNTO, Armanda Berta Dos Santos no dirije ba partidu CNRT katak, hare ba situasaun politika rai laran laiha serteza ba solusiona empase politika ne'ebé akontese durante tinan tolu nia laran. Hanesan Partidu Politiku tenke iha posizaun politika hodi fo solusaun ba empase politika ne'e.
Notisia relevante: KHUNTO Sai Ona Husi AMP, “La Fiar” CNRT Forma Tan Governu Foun
“Ho respeito tormak ba Maun Bo'ot Xanana Gusmão, Presidente Partidu CNRT, no Lideransa sira seluk mai husi PD, UDT/F-MUDANSA no PUDD nudar parseiro aliadu iha novo koligasaun ne'ebe asina akordo koligasaun iha dia 22 de Fevereiro de 2020 iha Sede CNRT Bairo Grilos-Dili,” hatete Prezidente partidu KHUNTO, Armanda Berta Dos Santos liu husi nia karta sai husi koaligasaun ho número referensia 037/P.KHUNTO/IV/2020 ne’ebé Oe-Kusi Post asesu Kuarta, 29 Abril 2020.
Armanda argumenta iha nia karta sai ne’e katak, situasaun koligasaun AMP seidauk hetan konfirmasaun no aseitasaun husi Presidente Repúblika ba existènsia husi koligasaun refere hodi fó alternativu ba formasaun IX Governo.
“Partido KHUNTO konsidera ba deklarasaun konfiansa no apoiu tomak husi Sua Excelência Presidente da Republica Sr. Fransisco Guterres "Lú-Olo" ba iha Primerio Ministro Taur Matan Ruak atu lidera nafatin VII Governo Konstituisional,” afirma Armanda.
Partido KHUNTO hola partemos iha estrutura Oltavu Govemo Konstitusional nune decide sei fo apoiu tomak ba Oltavu Governo Konstitusional to iha Tinan 2023.
