Oekusipost.com Dili – Partidu koaligasaun Aliasan Maioria Parlamentar (AMP) ne’ebé lidera husi partidu CNRT, oras ne’e naksobu dadauk ona basa partidu KHUNTO desidi sai ona husi koaligasaun ne’e ho rajaun laiha serteza atu forma tan governu foun iha tinan ida ne’e nia laran.
Partigu ki’ik 5 hamutuk ho partidu CNRT forma koaligasaun AMP iha loron Sábadu, 22 Fevereiru liuba ho objetivu atu forma governu foun bainhira desijaun Prezidente Repúblika, Francisco Guterres Lú Olo afavór ba koaligasaun ne’e, infelizmente to’o oras ne’e seidauk iha desijaun ruma maske Prezidente Repúblika mak husu rasik ba partidu politika sira halo movimentu politika hodi solusiona impase politika iha rai-laran.
Tuir karta rezignasaun Partidu Kmanek Haburas Unidade Nacional Timor Oan (P.KHUNTO) ne’ebé asina husi prezidente partidu KHUNTO, Armanda Berta Dos Santos no dirije ba partidu CNRT katak, hare ba situasaun politika rai laran laiha serteza ba solusiona empase politika ne'ebé akontese durante tinan tolu nia laran. Hanesan Partidu Politiku tenke iha posizaun politika hodi fo solusaun ba empase politika ne'e.
“Ho respeito tormak ba Maun Bo'ot Xanana Gusmão, Presidente Partidu CNRT, no Lideransa sira seluk mai husi PD, UDT/F-MUDANSA no PUDD nudar parseiro aliadu iha novo koligasaun ne'ebe asina akordo koligasaun iha dia 22 de Fevereiro de 2020 iha Sede CNRT Bairo Grilos-Dili,” hatete Prezidente partidu KHUNTO, Armanda Berta Dos Santos liu husi nia karta sai husi koaligasaun ho número referensia 037/P.KHUNTO/IV/2020 ne’ebé Oe-Kusi Post asesu Kuarta, 29 Abril 2020.
Armanda argumenta iha nia karta sai ne’e katak, situasaun koligasaun AMP seidauk hetan konfirmasaun no aseitasaun husi Presidente Repúblika ba existènsia husi koligasaun refere hodi fó alternativu ba formasaun IX Governo.
“Partido KHUNTO konsidera ba deklarasaun konfiansa no apoiu tomak husi Sua Excelência Presidente da Republica Sr. Fransisco Guterres "Lú-Olo" ba iha Primerio Ministro Taur Matan Ruak atu lidera nafatin VII Governo Konstituisional,” afirma Armanda.
Partido KHUNTO hola partemos iha estrutura Oltavu Govemo Konstitusional nune decide sei fo apoiu tomak ba Oltavu Governo Konstitusional to iha Tinan 2023.
“Ho razaun iha leten Partido KHUNTO ho konsiente rasik iha momentu ida ne'e hakarak hato'o agredese-wain ba Maun Bot Xanana Gusmão nudar Lideransa Partido CNRT no AMP ho Partidu PD, UDT/F-MUDANSA no PUDD ne'ebe durante ne'e ita servisu hamutuk, ho momento importante ida ne'e iha situasaun dificil tebes mai Partido KHUNTO atu foti desizaun, maibe tanba hare ba interese povo no ita nia estado maka Partido KHUNTO foti desizaun Sol husi Koligasaun AMP foun”.
Maske nune’e, tuir Armanda katak, partidu KHUNTO sei tane nafatin Maun Bo'ot Kay Rala Xanana Gusmão no pronto atu servisu hamutuk iha tempu oin ba interese ita nia povo no ita nia nasaun doben Timor Leste.
Responde ba katak ne’e, partidu CNRT halo kedas enkontru alargada iha oras tuku 3 lorokraik to’o kalan, maibé seidauk iha desijaun ruma, no tuir informasaun balun ne’ebé Oe-Kusi Post asesu iha terenu katak partidu CNRT sei fó sai nia pozisaun iha loron Kinta, 30 Abril 2020.
Enkontru alargada ne’e involve membru governu daualu ne'e mak Ministru Prezidensia Konsellu Ministru Agio Pereira, Ministra Edukasaun Juventude Desportu (MEJD) Dulce de Jesus, Ministru Administrasaun Estatál (MAE) Abilio José Caetano, Ministra Finansas (MF) Sara Lobo Brites, Sekretáriu Estadu Juventude Desportu (SEJD) Nélio Isaac Sarmento, Sekretáriu Estadu Kooperativa (SEKoop) Arsenio Pereira, Sekretariu Estadu Arte no Kultura (SEAK) Teofilho Caldas, Sekretáriu Estadu Veteranus (SEV) Gil da Costa "Oan Soru".
Prezidente Parlamentu Nasionál (PPN) Arão Noé de Jesus da Costa Amaral, Sekretariu Jerál interinu CNRT Jacinto Rigoberto, Asesór prinsipál PPN Julio Tomas Pinto, partisipa mós husi jurista Manuel Tilman, Xefe bankada CNRT Duarte Nunes ho nia membru tomak mós partisipa iha enkontru ne’e.
