AMBENO (TOP) – Deskonfia membru polisia hamutuk nain ha’at, feto rua, no mane rua husi serbisu investigasaun kriminal ba ameasa tan labarik orfonatu sira iha uma mahon Topu Honis, Kutet, Oe-Kusi Ambeno hodi rezulta labarik balun tenke halai subar ba iha ai-laran.
Prosesu julgamentu ba eis Padre RD ne’ebé hetan akuzasaun kriminal husi Ministériu Públiku kona-ba kazu pedofilia foin maka hahu prosesu julgamentu iha loron Tersa 23 Fevereiru liuba. Prosesu julgamentu ne’e taka ba públiku, no seidauk iha desijaun final husi Tribunal Distrital Oe-Cusse Ambeno, maibé infelizmente tuir informasaun balun ne’ebé The Oe-Kusi Post (TOP) asesu husi uma mahon Topu Honis Kutet katak iha loron Kinta 11 Marsu 2021 oras tuku 11 dadersan deskonfia oknum polisia investigasaun kriminal RAEO derepente mosu iha uma mahon ne’e hodi halo labarik sira sente trauma no balun halai sai ba subar iha ai-laran tuan.
Entretantu, membru polisia ida informa ba labarik orfonatu sira katak sira nia prezensa iha uma mahon ne’e, tanba hala’o de’it orden husi komando atu foti labarik sira ne’e hodi ba tau fali iha PRADET Oe-Kusi Ambeno.
“Maibé, ami tauk, ami la fiar polisia sira ne’e, tanba uluk sira maka mai foti ami ba halo visum,” hateten labarik orfonatu ida ba TOP, Sesta 12 Marsu 2021.
Entretantu, tuir informasaun balun husi responsavel uma mahon Topu Honis, Liliana Tarung rekoñese katak, iha duni membru polisia nain 4 (mane rua, no feto rua) maka ba iha uma mahon ne’e iha loron Kinta 11 Marsu 2021 oras tuku 11 dadersan.
“Horseik iha membru polisia nain 4 maka mai. Ha’u koñese de’it maka Lucas Falo, Nilda do Rosario, no nain-rua seluk tan, ha’u lakoñese,” hateten Liliana.
Nia esplika, iha loron Kuarta 10 Marsu 2021, nia hetan uluk kontaktu husi membru Polisia Lucas Falo katak sira atu halo vizita ida ba iha uma mahon ne’e ho rajaun la klaru. No iha loron Kinta membru polisia nain 4 ne’e to’o kedas uma mahon Topu Honis Kutet.
Nia mós sente hakfodak tebes ho prezensa membru polisia hirak ne’e, no sira nia prezensa kauza labarik orfonatu lubuk ida maka halai sai husi uma mahon ne’e, tanba sente tauk ba polisia sira ne’e.
“Maibé, bainhira kareta polisia nian foin maka to’o portaun oin ne’e, labarik sira imediata halai hotu tuir portaun kotuk nian,” Liliana esplika.
Nia hatutan, husi labarik lubuk ida, oras ne’e iha labarik orfonatu nain 10 maka mantein hela iha uma mahon ne’e, no labarik lubuk ida maka oras ne’e halai tiha ona ba ai-laran, tanba tauk polisia sira ne’ebé antes ne’e ba ka’er sira hodi lori ba halo visum.
Liliana konta, bainhira polisia sira ne’e ba iha uma mahon ne’e, nia iha hela nia eskritoriu laran, no rona lian-hakilar husi labarik orfonatu sira katak mana Lili favor halai, tanba polisia sira mai iha ne’e.
“Labarik lubuk ida maka halai tiha. Ha’u la halai ida. Ha’u permite sira tama ba área uma mahon, tanba sira mai ho uniforme polisia nian, maibé dezarmadu (sira la lori kilat) ida,” Liliana esplika.
Nia konta, hafoin permite membru polisia sira tama ba uma mahon laran, mosu konversa badak entre nia ho membru polisia sira ne’e, no membru polisia Lucas Falo hateten ba nia katak nia hatene labarik sira tauk polisia, inklui Liliana rasik.
“Ha’u responde ba Lucas Falo katak loos duni, labarik sira tauk duni ita boot sira nia prezensa iha ne’e, no Lucas dehan sira simu informasaun husi parte balun katak ami sente la seguru iha uma mahon ne’e, maibé ha’u dehan ba nia katak, ami iha ne’e sempre seguru loos. Justru polisia, no NGO balun maka halo ami sente la seguru iha ne’e,” Liliana konta ho laran triste.
“Labarik sira ne’e trauma durante tinan tolu ona, tanba ita boot sira sempre mai hela de’it, no hakarak halo serka no hadau,” Liliana konta hikas nia konversa ho membru polisia Lucas Falo iha uma mahon Topu Honis.
Entrentantu, komandante Polisia Rejiaun Administrativu Espesial Oe-Kusi Ambeno (RAEOA), Superintendente Xefe Mateus Mendes esplika ba TOP katak, nia maka haruka duni nia membru polisia nain 4 ba uma mahon Topu Honis iha Kutet, la’os atu ameasa, maibé atu hato’o de’it informasaun husi Prokuradoria Disitrtal Oe-Cusse nian ba Topu Honis Kutet.
“Ha’u PNTL, la’os politiku. Ha’u hala’o orden Estadu nian. Ne’ebé deskolasaun ha’u nian ba iha ne’eba ne’e laiha buat seluk…hanesan ba pasa de’it informasaun ba sira husi Prokurador Oe-Kusi nian. Orientasaun ida ne’e maka ami pasa de’it ba iha maluk sira iha ne’eba. Laiha tan buat seluk husi ami nia misaun atu ba Kutet ne’e,” esplika komandante Mendes ba TOP.
Antes ne'e, labarik orfonatu sira husi uma mahon Topu Honis Mahata, tanis ba eis padre RD ne'ebé fila ba Dili husi Oe-Kusi Ambeno iha loron Tersa 23 Fevereiru 2021.
