OEL-MAMBAI (TOP) – Periodu Estadu emerjénsia durante fulan 3 ne’e atu hado’ok Timor oan sira husi propagasaun moras virus corona (Covid-19), maibé hakbesik tebes sidadaun kbi’it la’ek sira ba mate hamlaha, tanba sira labele halo movimentu hodi buka osan no hahan, maibé amizade ida husi Australia naran Yass Gunning Belun tulun ona pasiente moras lepra no TB hamutuk nain 96 iha suku Usi-Tasae, Oe-Kusi Ambeno.
José da Costa husi Assosiasaun Yass Gunning Belun, Canberra, Australia katak hafoin hetan kontaktu husi madre CIJ iha Parokia Oel-Mambai kona-ba husu tulun, nia mós kontaktu kedas ho nai lulik sira liu husi Yass Gunning Belun hodi fó tulun foos saku 150 no mina kaixa 25 ba pasiente moras Lepra no TB iha aldeia Sifin, suku Usi-Tasae, sub-rejiaun Oe-Silo, Oe-Kusi Ambeno, Sábadu 6 Juñu 2020.
“Ita nia apoiu ne’e mai husi ita nia amizade sira husi Australia naran Yass Gunning Belun, Canberra, Australia. Ajuda ida ne’e ki’ik tebes, la boot, maibé ita hakarak fó tulun ba ita nia maluk sira ne’ebé mak sofre moras lepra no TB ne’ebé susar tebes ba sira atu buka osan no buka ai-han durante periodu Estadu emerjénsia ne’e,” hateten José da Costa ba The Oe-Kusi Post iha aldeia Sifin, suku Usi-Tasae, sub-rejiaun Oe-Silo, Oe-Kusi Ambeno, Sábadu 06 Juñu 2020.
“Ita nia apoiu ki’ik ida ne’e la boot, maibé ita espera katak ita nia governu bele ajuda liutan sira,” nia afirma.
Ambeno oan ne’ebé mai husi suku Lifau ne’e mós konsiente katak, durante fulan 3 nia laran ne’e susar tebes ba ema sira ho moras lepra no TB hodi buka osan no hahan.
Nia mós la’os lori de’it apoiu ba pasiente moras lepra no TB, maibé apoiu mós Maria Evarista iha parokia Oel-Mambai, inklui mós fó apoiu ba Madre Dominikana sira iha konventu Dominikana iha Oe-Kusi Ambeno villa.
“Ha’u agradese ba Prezidente Autoridade Rejiaun Administrativu Espesial Oe-Kusi Ambeno (RAEOA) – Zona Espesial ba Ekonómia Sosial Merkadu (ZEESM) ho nia ekipa tomak, tanba sira mak fasilita ha’u hodi lori apoiu hirak ne’e liu husi ro mai to’o iha fatin ida ne’e,” nia agradese.
Iha fatin hanesan, Madre Maria Evarista husi kongregasaun CIJ, no organizasaun Santo Nino de Prague katak sira nia misaun iha Parokia Oel-Mambai kuaje tinan rua ona, no hare sarani sira ne’ebé ho moras lepra no TB halo sira nia fuan moras tebes.
“Maibé, ami nia kbi’it la to’o atu ajuda sira, entaun foin lalais Covid-19 tama tan, ha’u konsege ba duni Misaun Lepra no Caritas Australia atu husu hahan, maibé sira nia hahan mós laiha ona, rezultadu laiha. Ho ida ne’e mak depois ha’u husu fali ba Yass Gunning Belun,” nia esplika.
Nia hatutan, sarani sira bainhira hare notisia iha televizaun, sira hetan ema barak iha Dili laran hetan ona apoiu barak.
“Maibé, ami iha foho ne’e lahetan. Ha’u dehan ba sira katak ha’u husu ona iha parte balun hodi ajuda ita de’it, no mai ita reza de’it hodi sira bele tulun ita. Tanba ne’e, ohin ha’u agradese tebes ba ajuda ida ne’e husi Yass Gunning belun no amu sira iha Australia,” madre Eva agradese.
Nia hatutan, ema ho moras lepra iha suku Usi-Tasa’e hamutuk nain 43, no ho moras TB hamutuk nain 53. Pasiente hirak ne’e mai husi aldeia 4, aldeia Buki, Sifin, Pune ho Nonkikan.
Entretantu, xefe suku Usi-Tasa’e, Tomas Ulan Colo agradese tebes ba apoiu ne’e, tanba bele tulun netik nia povu sira durante tempu difisil ne’e.
