OE-SONO (TOP) – Veteranus Kombatentes ba Libertasaun Nasionál husi Oe-Kusi Ambeno husu Primeiru Ministru, Taur Matan Ruak atu defende nafatin José Luis Guterres 'Lugu' hodi kontinua asume kargu Prezidente Autoridade ba Rejiaun Administrativu Oe-Kusi Ambeno (RAEOA), no Zona Espesial Ekonómia no Sosial Merkadu (ZEESM) to’o tinan lima.
"Ami husu ba primeiru ministru Taur Matan Ruak atu mantein José Luis Guterres hanesan Prezidenti Autoridade," hateten portavos Veteranus Ambeno, Agustinho da Costa liu husi konferénsia ba imprensa iha aldeia Oe-Sono, suku Costa, sub-rejiaun Pante Macassar, Oe-Kusi Ambeno, Kinta 04 Juñu 2020.
Konferénsia imprensa ne’e mós partisipa husi familia afetadu sira durante mandatu eis Prezidente Autoridade RAEOA, Mari Alkatiri ne’ebé to’o oras ne’e seidauk hetan kompensasaun, no sira hato’o pontu 5 ba governu sentral no ba Lugu hodi rezolve tiha assuntu pendente sira ne’ebé to’o oras ne’e seidauk hetan resposta.
Familia afetadu sira ne’e mai husi suku lima (5) iha sub-rejiaun Pante Macassar hanesan, suku Costa, Lifau, Cunha, no suku Lalisuk. No, veteranu sira ne’ebé hato’o assuntu ne’e mak hanesan, Agustinho da Costa (Fitun Fuik), Xavier da Costa (Rama Fuik), Elizeu Ximenes (Sau Kata Lemorai), Januario Gusmão Cardoso (Keneno), Manuel de J. Mota Brites (Mau Koli Komarka).
Ezijensia dahuluk mak sira husu ba lideransa politika nasionál ho nivel rejional atu servisu hamutuk hodi armonia politika estabilidade nasionál no rejional.
Pontu daruak mak sira mós husu ba governu sentral liu-liu Prezidente Autoridade RAEOA no ZEESM-TL, José Luis Guterres “Lugu” atu rezolve lalais problema kona-ba rai afetadu iha suku 5 ne’ebé to’o ohin loron seidauk hetan indemnizasaun.
Ezijensia ikus liu mak sira husu ba PM, Taur Matan Ruak atu mantein no defende nafatin José Luis Guterres 'Lugu' nu’udar Prezidente Autoridade ba RAEOA. Sira dehan PM, Taur Matan Ruak tenke defende Lugu, tanba ida ne’e nu’udar kompromisiu politika AMP nian bainhira promete iha Oe-Kusi Ambeno iha tinan 2018 katak bainhira AMP manan eleisaun, nia sei hasai Mari Alkatiri no Arsenio Bano husi Oe-Kusi Ambeno.
"Ami apoiu Lugu, tanba nia mós lideransa nasionál ida ne’ebé defende rai Timor-Leste to’o ukun rasik-an, no to’o ona tinan 20 mós nia nunka komete kazu boot no kazu krime ruma iha rai ida ne’e,” afirma Agustinho.
“Tanba ne’e ami hakarak defende nafatin Prezidente Autoridade, Lugu atu lidera nafatin RAEOA, tanba tuir nia moto, mai atu servi la’os atu ukun povo.”
Petisaun kontra Lugu ne’e propaganda politika
Veteranu sira ne’e mós husu ba ema hotu iha Oe-Kusi Ambeno atu labele privatiza no partidariza povu Ambeno hodi hetan poder, no konsidera petisaun ne’ebé joven nain 7 hatama ba orgaun soberanu sira ne’e nu’udar propaganda politika, maibé joven sira antes ne’e liu husi konferénsia iha restaurante Jade iha Pantai Kelapa foin lalais katak sira reprezenta “povu Oe-Kusi Ambeno”, maibé rezidente Oe-Baha Francisco Loka no seluk tan konsidera joven nain 7 ne'e laiha lejitimidade hodi reprezenta povu Oe-Kusi Ambeno tomak.
