Oekusipost.com Ambeno – Ema hamutuk nain 115 mak oras ne’e hela iha Sentru Akollimentu sira iha Rejiaun Administrativu Espes ial Oe-Kusi Ambeno (RAEOA), no nain 50 mak kumpri ona loron 14.
Responsavél ba Sentru Akollimentu Hotel Fitun Lima, dotor Tito Batista Anuno katak, númeru hirak ne’e maioria estudante de’it ne’ebé ba eskola iha provinsia balu n iha Indonézia.
“Hahu inisiu husi 23 Marsu 2020 to’o ohin 8 April hamutuk nain 115 mak tama ona iha fatin akollimentu. Iha H otel-Lifau nain 28, feto 12 no mane 16, no iha Hotel Fitun Lima nain 22, feto 14 no mane 8 mak livre ona,” hatete dotor Anuno ba Oe-Kusi Post iha Hotel Fitun Lima iha Oel-Upun, Oe-kusi Ambeno, Kinta 8 Abril 2020.
Nia hatutan, husi númeru 115 fahe ba fatin tolu, balun hela iha Hotel Fitun Lima, balun iha Hotel-Lifau no balun hela iha eis rezidensia Sekretariu Rejional RAEOA sira nian iha Fulolo. Iha Hotel-Lifau rasik hamutuk ema nain 42, feto 23 no mane 19. Hotel Fitun Lima iha ema nain 57, feto 23 no mane 24, no iha eis rezidensia Sekretariu Rejional sira nian hamutuk ema nain 16, feto nain 4 no mane 12.
“Iha mós autokarantina hamutuk nain 3. Indonézia nain 2, Ambeno oan nain ida. Ami monitoriza sira durante oras 24 nia laran no sira iha hotel sira mós hetan tratamentu hanesan,” esplika médiku ne’e.
Notisia relevante: Ambeno Oan Nain 44 Hela Iha Sentru Akollimentu
Diretór Interinu Saúde RAEOA, Marcos Seo agradese ba buat hotu, liliu ba Maromak, tanba maske número ema aumenta iha Oe-Kusi Ambeo, maibé to’o oras ne’e seidauk iha ema ida mak iha sintoma ba moras virus corona.
"Oe-Kusi Ambeno ne’e preparadu tantu rekursu fatin ho ekipamentu sira atu asegura ita nia estudante sira ne’ebé mak tama ho legal ka illegal, ida ne’e mak ha’u hatete ba públiku, maibé ita agradese ba Na’i Maromak atu akompaña nafatin ita,” agradese diretór Seo.
Nia hatutan, iha pessoal médiku hamutuk nain 9 ho infermeiru nain 3 mak halo kontrolu ba Sentru Akollimentu sira iha Oe-Kusi Ambeno. "Sira ne’e halo shift durante oras 24 nia laran, sira mantein iha ne’e sei la fila ba uma tanba iha ne’e sira halo avaliasaun periodikamente ba kondisaun saúde nian,” Seo esplika.
