Oekusipost.com Numbei – Autoridade Rejiaun Administrativu Espesial Oe-Kusi Ambeno (RAEOA) hahu monta ona bee ba fatin públiku sira, liliu iha merkadu Numbei hodi fasilita populasaun sira atu fase sira nia liman ho sabaun nu’udar dalan ida prevene a’an husi moras pandemia virus corona (COVID-19) iha rai ketan ne’e.
Xefe Gabinete Interinu Prezidente Autoridade ba RAEOA, Agustinho Caet esplika, RAEOA sei halo esforsu atu kontinua monta bee ho sabaun fase liman sira fatin públiku sira iha Oe-Kusi Ambeno inklui iha merkadu Numbei hodi fó tulun ba negosiante sira inklui komunidade sira seluk atu uza bee ne’e ba fase liman.
“Ida ne’e foin mak halo iha merkadu ne’e, maibé orsida ita sei ba tau tan ida ka rua iha eis merkadu Tono no fatin públiku sira seluk tan,” hatete Caet ba Oe-Kusi Post iha merkadu Numbei, Sábadu, 4 Abril 2020.
“Maske ita seidauk iha suspeitu ba virus corona, maibé nu’udar responsavél iha dever hodi fó apoiu no prepara saida mak komunidade sira presiza hanesan antes tama mai merkadu tenke fase liman lai ho sabaun mak foin bele tama ba hola sasan iha merkadu laran,” esplika alumi Universidade Hawaii ne’e.
Hafoin monta fasilidade ne’e, Xefe Komisaun Prevensaun COVID-19 RAEOA, dotor Batolomeu Pereira hamutuk ho nia ekipa sira kontinua habelar informasaun ba komunidade sira kona-bá utilizasaun fasilidade ne’e.
“Ohin ami mai atu husu ba imi hotu iha merkadu ne’e imi faa’n sasan presija prepara bee ho sabaun para ema mai fase liman, tur keta rabat malu, uza máskara, agora ita nia autoridade RAEOA tau ona bee ida iha ne’e atu fase liman ho sabaun. Ida ne’e atu tulun ita atu labele ba do’ok hodi buka bee, maibé bele fase de’it iha ne’e,” esplika dotor Barto ba negosiante sira iha merkadu ne’e.
Loron Sábadu nu’udar loron merkadu Numbei nian, maibé tuir observasaun Oe-Kusi Post nian iha merkadu ne’e, movimentu menus. Lahanesan ona ho loron Sábadu sira liuba ne’ebé nakonu ho negosiante sira.
Komandante PNTL RAEOA, Superintendente Xefe Arnaldo de Araújo hamutuk ho nia ekipa sira kontinua sosializa medida sira durante Estadu emerjénsia ba negosiante sira iha merkadu Numbei ne’e inklui iha fatin hotu iha Oe-Kusi Ambeno.
