Oekusipost.com Ambeno – "Hadau malu" pozisaun iha komisaun COVID-19 ne’e la’ós akontese de’it iha Dili, maibé akontese mós iha rai ketan Oe-Kusi Ambeno.
Video badak ne’ebé oras ne’e sirkula iha plata forma media sosial hatudu, diretór interinu saúde Oe-Kusi Ambeno, Marcos Seo tama ba Sentru Akollimentu (Kuarentena) iha Hotel Fitun Lima iha Oel-Upun hakilar malu ho lian maka’as, no hasai lia-fuan duni malu hanesan duni animal fuik sira iha ai-laran tuan.
Iha video laran mosu diskusaun entre Marcos Seo ho Xefe Seksaun Apoiu ba Hospital Referal Oe-Kusi, dotora Merita Lafo ho nia staff lubuk ida.
“La’e, ha’u rona dehan ne’e iha problema. La problema fila,” hakilar Marcos Seo iha video badak ho nia durasaun minutu ida, segundu 35 ne’ebé Oe-Kusi Post asesu.
Nia staff sira husu dehan se mak telefone nia, maibé Marcos hatudu nia arogante hodi hakilar duni de’it.
“Diretor étika laiha,” hatete staff ida ne’ebé uja faru kinur iha video laran ne’e, Marcos Seo hatan ho duni fila de’it.
Hafoin hakilar malu ne’e, diretor Marcos hatudu hahalok hanesan labarik ki’ik, hodi buat hotu tenke telefone ba Ministra Saúde iha Dili.
“Ha’u telefone ministra agora, ha’u telefone ministra agora. Ha’u rona dehan mai iha problema,” hakilar Marcos Seo.
Maske komisaun COVID-19 iha Oe-Kusi Ambeno kompostu husi entidade barak inklui médiku sira iha hospital, maibé Marcos Seo nia hakarak ne’e bainhira ema ruma atu tama ka vizita ba sentru akollimentu hirak ne’e tenke husu nia autorizasaun, tanba nia mak xefe komisaun.
Liga ba dezintendementu ne’e, Xefe Seksaun Apoiu ba Hospital Referal Oe-Kusi Ambeo, Merita Lafo esplika, iha loron Kuarta ekipa seksaun klinika husi Hospital referal Oe-Kusi hakarak ba observa direita karantina ka sentru akollimentu ne’e atu hare serbisu karantina nian kona-bá atendimentu espesial klinika para hasoru direita ho médiku sira kona ba lala’ok atendimentu ba ema sira hela ne’e oinsa.
“Maibé derepente diretór Interinu tun husi kareta duni de’it sira ho razaun katak nia simu informasaun husi pesoal balu katak problema mosu iha sentru akollimentu ne’e,” esplika dotora Merita.
“Ami to’o ne’eba ko’alia kona-bá oinsa organiza atu fó atendimentu ba ema sira hela ne’e, no saida mak atu presiza tan, ami halo observa iha ne’eba depois mak bele ko’alia ho diretór interinu ho dotor sira ne’ebé responsavel iha ne’eba, maibé depois iha xamada katak Marcos Seo atu mai, entaun ami hein nia. Maibé, infelizmente kuandu nia tun husi kareta nia hanoin iha problema, la hatene se mak telefone,” esplika dotora Merita.
“Entaun, Marcos ne’e mai seidauk tun, langsung hakilar ami iha ne’eba, no la hatene se mak hasai video tan, ne’ebé ba problema la iha ne’e akontese tanba miskomunikasaun de’it, tanba ita la husu bainhira ami tun direita husu nia problema ne’e saida, maibé ha’u laiha problema só miskomunikasaun itoan de’it”. nia esplika.
Iha Dili mosu hadau malu kona-bá portavoz COVID-19, no iha Oe-Kusi Ambeno mós hanesan. Akontesementu rua ne’e akontese iha loron Kinta hotu. Konsekuensia husi akontensimentu ne’e mak Primeiru-Ministru Taur Matan Ruak hasai kedas Ministra Interina Saúde, Elia Amaral, no iha Oe-Kusi Ambeno, Marcos mós husu ona polisia hodi ka’er ema ne’ebé hasai video no públika sai video ne’e ho rajaun video ne’e hamoe nia a’an nu’udar diretór.
“Ema ne’ebé espalla video viral ne’e ha’u informa ona ba polisia, ita hein de’it para ka’er atu investiga nia,” hatete Marcos Seo ba Oe-Kusi Post iha Oe-Kusi Ambeno, Kinta 2 Abril 2020.
“Ida ne’e papel polisia nian atu investiga, labele halo pániku, tanba ida ne’e grave. Ha’u informa ona ba komandante Arnaldo de Araúj ho komandante eskuadra Pante Makassar tanba ne’e sira nia servis. Se mak viral video ne’e sira nia kompetensia atu invetsiga nia,” nia husu.
Entretantu, komandante polisia Oe-Kusi Ambeno, Superintendente Xefe Arnaldo de Araújo katak, to’o oras ne’e seidauk simu keixa eskrita, maibé simu de’it telefone hodi ba ka’er ema ne’ebé hasai video ne’e.
“Ami simu duni telefone dehan atu halo kapturasaun ba ema ne’ebé halo video ne’e, maibé la iha karta, nia so telefone de’it. Ida ne’e ami la presija, presija de’it nia keixa eskrita hakerek iha surat mak fó mai para PNTL halo serbisu ,” esplika komandante Arnaldo.
