DILI (TOP) – Ema nain 7 ne’ebé mout iha tasi klaran iha loron Sabádu 15 Maiu 2021, nain 3 konsege nani sai ona iha rai-maran iha área Dolok-oan, no nain 4 seluk oras ne’e sei iha hela prosesu buka tuir ne’ebé seidauk hetan.
Pasajeiru Moises Tome ba dala uluk, nia fó obrigadu ba Maromak, tanba Maromak Nia di’ak maka bele koidadu sira nani sai to’o rai-maran.
Nia konta, iha pasajeiru nain 4 maka sa’e pasajeiru lori simentu saku 50 ho sasan sira seluk atu lori ba Atauro. Pasajeiru hamutuk nain 4, no nain 3 seluk ne’e nu’udar bero nain.
“Ami sa’e ba Atauro, sa’e tuir ro pasajeiru ne’e, maibé ro pasajeiru ne’e, tanba nia tula sasan la tuir standar ro nian, ne’ebe ami halai to’o tasi klaran hahu hasoru ona ondas boot, la kleur hasoru ondas boot liutan. Nune’e, halo ro haksoit dala rua de’it monu tun ba tasi-okos ona, tanba lori sasan todan liu,” hateten Moises Tome ba jornalista sira iha HNGV, Dili, Domingu 16 Maiu 2021.
Nia konta, iha tempu ne’eba ro monu tun ba tasi-okos ho velosidade maka’as, ro’o nia kidun maka tun uluk, no ulun maka tun tuir.
“Ro ne’e lakon kedas. Ro tun ona, ami laiha esperansa ona atu moris ka atu mate. Ami nu’udar relijiaun protestante, ami kuandu hetan dezastre ami nia lia-fuan primeiru maka ba Maromak. Ami husu Maromak ajuda ami. Ami nain tolu ne’e hetan ai-kabelak tolu, no hahu nani sai ba liur ona, maibé sente la seguru. Ami hanoin katak ida hanesan ne’e balun bele mate. Entaun, ami husu ba Maromak katak ajuda ami. Derepente de’it ai ida, manu-mutin ida tur hela iha ai ne’e nia leten, no tahek nia liras,” nia konta.
Nune’e, nia dehan, sira nain tolu komesa soe tiha ai-kabelak sira ne’e, no nani ba ai ne’ebé manu mutin ne’e tur hela iha leten. Husi ne’e sira nain tolu fahe malu, ida iha ai ne’e nia ulun, ida iha ai nia klaran no ida seluk iha ai nia nain, no nain tolu ne’e hahu nani sai mai rai-maran.
Moises konta husi Sabadu dadersan to’o fali Domingu 16 Maiu 2021 dadersan iha oras tuku 4 dadersan maka ikan ida tata hela nia maluk ida seluk nia ai-ain maka sira mós konsege ka’er tiha ikan ne’e hodi han no lori de’it nia ulun sai mai rai-maran.
Sira ne’ebé konsege nani sai mai rai-maran maka hanesan Moises Tomes (47), Fredi Gomes (17), no Nuno Alves ne’ebé ikan konsege tata nia ai-kabun iha parte karuk. Sira nain 3 ne’e oras ne’e sei kontinua simu hela tratamentu intensivu iha HNGV.
