DILI (TOP) – Embaixada Estadus Unidus iha Dili liu husi projetu USAID nian Turizmu Ba Ema Hotu (TBEH) prepara ona inisiativa hodi ajuda Governu Timor-Leste no Timoroan sira-nia negósiu rekupera husi lakon rendimentu durante pandemia COVID-19. Objetivu projetu nian mak atu estimula demanda turizmu, ajuda emprezáriu ki’ik no médiu no liga pioneiru turizmu Timor-Leste nian ba industria turizmu internasionál.
Bazeia ba análize husi entrevista sira halo ho operadór turizmu sira iha Timor-Leste komesa husi ajénsia luku too ba otél no artezanatu sira, TBEH identifika pilar tolu hodi rekupera estratéjia ne’ebé foka ba jestaun krize no redús nia impaktu; fornese estimulasaun no aselera rekuperasaun; no prepara ba iha futuru.
TBEH mós prepara “Inisiativa Reinisia Turizmu Timor-Leste” hodi apoia Ministériu Turizmu, Komérsiu no Indústria atu reativa indústria refere. TBEH nia idea inklui kampaña doméstiku hodi estimula nesesidade turizmu nian iha nasaun nia laran; estabelese liña konsultivu ida ba negósius ki’ik no médiu hodi buka ajuda; kolabora ho instituisaun mikro-finansa hodi hadi’a asesu ba iha finansiamentu ba negosiu sira ne’e; no, TBEH mós propoen dalan seluk hodi rekoñese destinasaun turizmu ne’ebé iha no rekoñese pioneiru no líder sira ba turizmu komunitáriu.
“Reinísiu Projetu Turizmu Ba Ema Hotu hanesan ezemplu ida oinsá Estadus Unidus bele apoia Timor-Leste durante hasoru dezafiu husi pandemia COVID-19 no redús impaktu ba ekonomia, inklui iha industria turizmu,” hateten Embaixadora Estadus Unidus Kathleen Fitzpatrick.
“Estadus Unidus kompremetidu ba nia apoiu globál no ba Timor-Leste atu adapta ami nia programa hodi bele hasoru dezafiu ne’e liu husi kontribuisaun finanseiru, ne’ebé mak atinje ona besik miliaun $1 no besik billaun $1 ba mundu tomak.”
“Nu’udar empregadór ba ema hamutuk 220 iha Timor-Leste, liu-liu iha servisu indústria ospitalidade nian, ami fiar esforsu hamutuk ho Governu Timor-Leste no ajénsia seluk inklui USAID nia Projetu Turizmu Ba Ema Hotu importante tebes ba revitaliza indústria Turizmu iha Timor-Leste,” hateten Sam Aluwihare, Xefe Ofisiais Ezekutivu East Timor Trading Group no mós Vise Prezidente ba Otél Nain sira iha Timor-Leste.
“Ne’e importante tebes ba asegura saida mak ita harii ona iha tinan 18 nia laran, mantein ita-nia ema kontinua iha servisu no reinisia setór ida-ne’e hodi atinje objetivu nasaun nian ba diversifika ekonomia no atrai turistas hamutuk 200,000 iha tinan 2030 mai Timor-Leste.”
TBEH ajuda Ministériu Turizmu, Komérsiu no Indústria Timor-Leste nian hodi implementa estratéjia turizmu nasionál ho objetivu atu atrai turista internasionál hamutuk 200,000 kada tinan to 2030 hodi aumenta nasaun nia rendimentu millaun $150 no fó servisu ba ema hamutuk 15,000. Harii industria turizmu hanesan elementu importante ba planu Timor-Leste nian hodi diversifika nia ekonomia ne’ebé dependente ba mina.
Estadus Unidus ajuda ema iha mundu tomak la’os de’it liu husi Governu Estadus Unidus maibé mós liu husi jenerosidade setór privadu, grupu lá’os lukrativu, organizasaun sosiál, organizasaun fiar nian, no individu sira. Amerikanu sira fornese ona besik billaun $4 iha ninia doasaun no asisténsia, aleinde ba saida mak Governu Estadus Unidus fornese ona iha mundu tomak.
Governu Estadus Unidus, liu husi USAID, servisu hamutuk iha parseiru ho Governu Timor-Leste hodi apoiu baze ne’ebé luan no dezenvolvimentu ne’ebé efetivu. Dezde tinan 2001, USAID fornese besik millaun atus tolu lima nulu iha asisténsia dezenvolvimentu ba Timor-Leste. USAID apoiu Timor-Leste nia esforsu hodi harii nasaun ne’ebé demokrátiku, saudavel no prósperu liu husi programa ne’ebé mak haforsa kreximentu ekonomia ne’ebé inkluzivu no sustentável, espesiálmente iha setór agrikultura no turizmu; hadi’a saúde povu Timor-Leste nian, partikularmente feto no labarik; no haforsa fundasaun ba boa governasaun – area hotu ne’ebé mak marka iha Timor-Leste nia Planu Estratéjia Dezenvolvimentu 2013-2030 no sei serve ba halo nasaun bele reziliénsia liu tan iha futuru.
