DILI (TOP) – Sekretáriu Estadu Formasaun Profisionál no Empregu (SEPFOPE), Julião da Silva hateten, timor-oan hamutuk nain 20 resin mak oras ne’e serbisu illegal iha Australia no lubuk ida mak sei fila mai Timor-Leste, tanba kontratu mak hotu ona.
Nia hatutan, traballadór timor-oan iha Austrália hamutuk nain 30, maibé iha traballadór feto nain-4 mak isin-rua (grávida) no traballadór iha Korea Súl hamutuk na’in-60.
"Ohin mai hasoru Primeiru Ministru atu up date (atualiza) hela situasaun kona-ba ita nia sidadaun Timor-oan sira ne'ebé sira nia kontratu remata ona iha Korea inklui mós sira balu serbisu iha Austrália," Julião hateten ba jornalista sira iha Palásiu Governu, Dili Tersa 09 Juñu 2020.
Nia dehan, iha traballadór timor-oan nain 20 resin iha Austrália aplika hela viza protections.
“Signifika katak bele sai ilegál, no mós sira balun grávida nune'e tenke fila mai Timór. Tanbá ne'e ohin Primeiru Ministeriu orienta ona katak ba Austrália ne'e fasíl atu bele fila tanbá ita iha aviaun Air North,”nia esplika.
Ba traballador sira iha Korea Sul, Julião dehan governu sei halo komunikasaun ho governu Indonézia no mós governu Singapore atu bele autoriza sidadaun sira mai tranzit liuhusi ne'ebá. No, sei presiza serbisu hamutuk ho ekipa jestaun krize atu oinsa mak bele prepara fatin kuarentena sira.
Timor-oan sira ne’ebé serbisu iha Korea Sul hamutuk nain 60 mak sira-nia kontratu remata tiha ona.
