TOKYO (TOP) – Pessoa eminente ba organizasaun g7+ fó palestra públiku (Public Lecture) kona-ba “papel nasaun g7+ nian hodi Hari Pas” ba estudante sira nain 70 ne’ebé estuda kona-ba Koperasaun Internasional no Hari Pas (International Cooperation and Peacebuilding) iha Universidade Waseda iha Japaun.
Professor Yamada Mitsuru husi Departementu Relasaun Internasional iha Fakuldade Siensia Sosiais husi Universidade Waseda bainhira halo abertura ba palestra ne’e, introduz Kay Rala Xanana Gusmão, nu’udar akademista ida iha Universidade Waseda tanba universidade oferese ona doutór onoráriu (Honorary Doctorate) iha Direitu (Law) iha tinan 2016.
Professor Yamada vizita ona Xanana bainhira sei kumpri hela pena prizaun his prijaun Cipinang, Indonesia no nia konsidera Xanana nu’udar lider ida ne’ebé di’ak tebes iha Timor-Leste.
Entretantu, Kay Rala Xanana Gusmão iha ninia intervensaun, ko’alia kona-ba estabelesimentu husi g7+ nu’udar organizasaun intergovernamental, halibur hamutuk nasaun 20 ne’ebé afeita husi konflitu atu fahe esperiensia no aprende ba malu kona-ba paz no rekonsiliasaun liu husi programa koperasaun entre Frajil-ba-frajil (F2F). g7+ mós defende maka’as ba Objetivu Dezenvolvimentu Sustentavel (ODS)16: kona-ba Paz, Justisa no Haforsa Institusaun nu’udar fundasaun ida atu atinji ODS sira seluk.
Xanana reforsa tan kona-ba importansia husi paz hodi hateten katak “se la iha paz, sei la iha dezenvolvimentu” nudar moto husi g7+.
